Liðskiparin í Fuglafirði hevur longt

Soleiðis skrivar ÍF á Facebook-síðu sínari.

Karl Abrahamsson Løkin fekk sín fyrsta dyst í fremstu røð í Føroyum í 2010 - fyri NSÍ móti ÍF. Hetta vísir FaroeSoccer. Hann var við at vinna Løgmanssteypið fyri barndómsfelagið í 2017. Fyriuttan eitt stutt skifti í Víkingi og í donskum fótbólti, hevur Karl Løkin umboðað NSÍ ella ÍF.

Seinastu árini hevur Karl verið liðformaður í Fuglafirði, og timburmaðurin hevur spælt meira í miðverjuni enn á miðvøllinum seinastu tvey árini. Í ár spældi hann samanlagt 27 dystir og skoraði tvey mál fyri ÍF - tað seinna bjargaði í roynd og veru ÍF lívinum í Betrideildini, tí tað var brotsspark í yvirtíðini í næstseinasta umfari móti tætta kappingarneytanum, TB.

Karl eftir stóru løtuna og sigurin á TB (Mynd: Sverri Egholm)


Karl Løkin og systurin Elin Løkin hvør sínumegin formann felagsins, Georges Rouah (Mynd: ÍF)

Í 2024 skulu Karl Løkin og liðfelagirnir royna at vinna sær støðufesti í Betrideildini.

Elvio Gelmini verður helst ein umráðandi brikkur í hesum. 27-ára gamli argentinin spældi í Fuglafirði í fyrru hálvu í 2022, tá ÍF var í 1. deild, og var á liðnum alt 2023. Hart arbeiðandi miðvallarin/verjuspælarin hevur, sambært FaroeSoccer, spælt 42 dystir fyri ÍF seinastu 2 árini, og fyri jól gjørdist endaliga greitt, at Elvio heldur fram í Fløtugerði.


Georges Rouah og Elvio Gelmini (Mynd: ÍF)

Tøl: FaroeSoccer