Líggjas Jógvansson vann Føroya Banki Open

Árliga golfkappingin, Føroya Banki Open, varð spæla á golfbreytini á Glyvursnesi í rættiliga nógva vindinum leygardagin.

Kappingin var skipað sum ein stableford-kapping, ið merkir, at spælararnir fáa stig í mun til teirra handikapp. Tí er vinnarin ikki altíð tann spælari, ið brúkar fægst sløg, men tann, ið klárar seg best í mun til sítt handikapp.

Kappingin var býtt upp í tvær stablefordkappingar. Ein fyri seniorar, sum spældu 9 hol og so tann vanliga, sum varð spæld á fullum vølli við 18 holum.

Eisini varð kappast um at ligga næst holinum á teimum báðum par 3-holunum, sum eru á breytini.

Hóast tað var ein stablefordkapping, var eisini kappast um at brúka fægst sløg til 18 hol.

Fyri at fáa spælararnar at hjálpa hvørjum øðrum, var hvør bólkur eisini eitt lið, sum kappaðust í eini liðkapping.

Stjórin í Føroya Banka - Turið Finnbogadóttir Arge – handaði vinnarunum vinningar, umframt at geva øllum luttakarunum eini eskju av golfbóltum við búmerkinum hjá Føroua Banka á.

Frá vinstru: Palli Henriksen, Líggjas Jógvansson og Bjarne Jørgensen

Úrslitini vóru hesi:

Næst holinum á 2/11: Graham Stewart
Næst holinum á 5/14: Wentzel Kamban
Á vinnandi liðnum, sum hevði 30 stig í meðal, vóru: Páll Kjærbæk, Julius Johannesen og Óli Jacobsen
Spælarin, sum brúkti fækst sløg: Wentzel Kamban við 91 sløgum.

Í stablefordkappingini yvir 9 holum var úrslitið hetta:
1. Julius Johannesen 32 stig
2. Janus Norðberg 31 stig
3. Suni Rasmussen 31 stig

Í stablefordkappingini yvir 18 holum var úrslitið hetta:
1. Líggjas Jógvansson 31 stig
2. Palli Henriksen 31 stig
3. Bjarne Jørgensen 31 stig

Tá tað stendur á jøvnum í stigum millum spælarar, vinnur spælarin, sum hevur lægst handikapp. 

Julius Johannesen saman við Turið Finnbogadóttir Arge, stjóra í Føroya Banka