Málið um møguligt leikbann liggur nú í Aganevndini

Sum Portalurin skrivaði mikudagin, so kundi málið um møguligt leikbann til Árna Frederiksberg enda í Aga- og Etiskunevndini. Soleiðis varð eisini.

Starvsnevndin í Fótbóltssambandinum tók seinnapartin fríggjadagin endaliga avgerð um at senda málið víðari. Hetta var eftir, at hoyringsskriv frá millum annað KÍ vóru komin inn í gjár.

Hetta skrivar Kringvarpið.

Nógva umrødda hendingin millum Meinhard Debes Geyti hjá EB/Streymi og Árna Frederiksberg fór fram í horninum undir KÍ-høllini sunnudagin. Meinhard fekk reytt kort fyri hevnisøku og hevur longu sitið uttanfyri ein dyst, meðan dómarin ikki fangaði gerðina hjá Árna áðrenn.

EB/Streymur sendi skriv inn til FSF um málið mánadagin.

Síðani hevur Árni Frederiksberg spælt ein dyst. Hetta var á Svangaskarði í gjár. Spurningurin er so, um lyklaspælarin hjá KÍ verður tøkur til steypadystin móti HB mánakvøldið og teir næstu dystirnar.

Kristin Dam Ziska, aðalskrivari í FSF, segði við Kringvarpið í gjár, at tað er óvist, nær niðurstøðan kemur - men at tað burdi gingið "rímiliga skjótt".

Nú partarnir eru hoyrdir, og dystur er aftur á skránni, so eigur hetta málið heldur ikki at liggja nógv longri.

Sambært nýggju viðtøkunum kunnu videoupptøkur brúkast í slíkum máli. Í hesum førinum vístu upptøkurnar hjá Televarpinum rættiliga greitt hvat hendi.

Málið sum so liðugt fyri EB/Streym

Meinhard Geyti er liðugur við sítt leikbann. Portalurin hevur ikki fingið tað 100 prosent váttað, men sum skilst, so sleppur Sigfríður Clementsen aftur at vera við síðulinjuna aftur sunnudagin 13. apríl. Tá spælir EB/Streymur móti B68 - EB/Streymur trekti fríumfar í steypakappingini, sum byrjar mánadagin,

Sí eisini: Sebastian Lau fekk tríggjar dystir leikbann - Jákup Vilhelmsen tveir

Hósdagin stóð Jákup Mikkelsen, málmansvenjari, sum høvuðsvenjari hjá EB/Streymi, tá HB vitjaði.

Vanligt er at venjarar fáa ein dyst venjarabann, tá teir verða burturvístir. Her hava myndirnar av Sigfríði Clementsen, har hann vísir longutong inn á vøllin og móti dómaranum, helst ikki spælt inn. Tær vóru bert at síggja á sosialu miðlunum.

Tá eitt reytt kort er givið undir dysti, er tað so at siga bert dómarafrágreiðingin, sum spælir inn, um støða skal takast um møguligt longri leikbann. Tað er ikki alment, hvørjar viðmerkingar Heini Ziskason Viðoy, dómari á degnum í Klaksvik, hevur havt til reyðu kortini.

Bæði Meinhard Debes Geyti og Sigfríður Clementsen standa til at vera tøkir til næsta dyst í skipanini Comet, har man ger dómaraseðlar.  

Sambært vegleiðingini um leikbann burdi Meinhard Geyti helst fingið leikbann í tveir dystir, men tað hevur heilt vist ávirkað í avgerðini, at hann varð ertaður í støðuni. Dømi hava verið um slíkt áður í føroyskum fótbólti.