Mbappe og Haaland væl frá byrjan

Fyrstu átta dystirnir í Champions League-bólkaspælinum vórðu leiktir í gjár.

Byrjað varð við tveimum dystum, ið vórðu bríkslaðir í gongd klokkan 17.45. FCK kom væl frá byrjan í dystinum í Dortmund, men heimaliðið revsaði tvey mistøk frá leyvunum undan steðginum, og favorittarnir vunnu at enda trygt 3-0. Í Zagreb stóð Dinamo fyri óvæntaðum úrsliti, tá Tuchel og Chelsea vórðu send heim við ongum. Áleyparin Mislav Orsic skoraði einsamalla málið tíðliga í dystinum.

Ein áleypari, sum heldur fram at skora, er Erling Braut Haaland. Norðmaðurin skoraði tvey av málunum í sannførandi 4-0 sigrinum hjá Manchester City í Sevilla. Haaland hevur nú 12 mál í 8 skrásettum dystum fyri nýggja felag sítt og hevur eitt gott miðaltal í Champions League - Sevilla er kreppurakt.

Haaland kundi aftur fegnast um mál í gjár 

Kylian Mbappé gjørdi eisini vart við seg. Tá helmingurin av fyrra hálvleiki var farin, hevði fraklendingurin skorað tvey mál, og tað endaði 2-1 á Parc des Princes. Juventus minkaði um munin tíðliga í 2. hálvleiki, men heimaliðið var omaná, og við sterkari manning vil liðið úr París royna at koma longri í Champions League hesuferð.

Meistararnir vunnu 3-0 í Glasgow við sannførandi avriki í seinna hálvleiki. Vinicius Junior, ið skoraði avgerandi málið í finaluni fyrr í ár, setti hol á, og Luka Modric og vælupplagdi Eden Hazard øktu fyri Real. Hazard hevði avloyst skadda Karim Benzema eftir hálvan tíma.

Í sama bólki vann Shaktar Donetsk óvæntað 4-1 í Leipzig.

Champions League bólkaspæl - 1 umfar
Í gjár - 06.09

Bólkur E:
Dinamo Zagreb - Chelsea 1-0
FC Salzburg - AC Milan 1-1

Bólkur F:
Celtic - Real Madrid 0-3
RB Leipzig - FC Shakhtar Donetsk 1-4

Bólkur G:
Borussia Dortmund - FCK 3-0
Sevilla FC - Manchester City 0-4

Bólkur H:
PSG - Juventus 1-2
SL Benfica - Maccabi Haifa 2-0


Átta dystir verða eisini leiktir í kvøld.

Í dag - 07.09

Bólkur A: 
17.45: AFC Ajax - Rangers FC
20.00: SSC Napoli -  Liverpool FC

Bólkur B: 
Atletico Madrid  - FC Porto
Club Brügge - Bayer Leverkusen

Báðir dystirnir byrja klokkan 20.00

Bólkur C: 
Inter Milan - Bayern München
FC Barcelona - FC Viktoria Plzen

Báðir dystirnir byrja klokkan 20.00

Bólkur D:
17.45: Eintracht Frankfurt - Sporting Clube de Portugal
20.00: Tottenham Hotspur - Olympique de Marseille