Myndir: Føroysk venjing í Sundby

Í morgun vandi føroyska liðið á graslíkisvølli beint við leikvøllin hjá Fremad Amager, har Føroyar vandu í gjár og fara at venja aftur nú seinnapartin. Tað var nakað av vindi og kølið, men lagið var heilt gott, og inntensiteturin var høgur til venjingina, har leikararnir veruliga tyktust at vera á.

Vant varð í áleið ein tíma og eitt korter. Nakað av “koordinatión” var sum upphiting við fysioterapeutinum, síðani vóru nøkur alveringsspøl, og endað varð við trimum móti trimum í interval-spæli uppá tvey mál.

Áðrenn hetta varð spælið uttan bólt vant í áleið tíggju minuttir. Har kundu ábendingar síggjast um, hvussu Lars Olsen og Jóannes Jakobsen ætla at blanda kortini til dysitn í Noreg hóskvøldið. Níggju útileikarar vóru í vesti fyrst: Fimmbaksetan við trimum miðverjum var Gilli Rólantsson, Odmar Færø, Atli Gregersen, Heini Vatnsdal og Ári Mohr Jónsson. Harvið bendir tað á, at Gilli, Odmar og Ári, ið allir spæla í norskum fótbólti koma inn á liðið í mun til seinast. Á miðvøllinum var einki, sum loypti hvøkk á: Sølvi Vatnhamar, Rógvi Baldvinsson, Brandur Hendriksson og Jóannes Bjartalíð vóru í grønum vesti fyrst. Hallur Hansson hevur leikbann.

Allir hini útileikararnir, uttan áleeypararnir, vóru eisini í verjustøðu eina løtu, og tað er ikki nakað ið er ásett enn, nú stór trý samdøgur eru til dystin. Tað kann væntast, at Jóan Símun Edmundsson verður fremsti maður í Oslo.

Venjing er aftur á skránni á Sundby Idrætsspark klokkan 15 lokala tíð.