Noreg og Svøríki hava spælt seg til OL

Nú er endaliga greitt, hvørji lið skulu kappast um OL-gull í manshondbólti í Tokyo í summar. OL er sera stórt í hondbóltsheiminum, serliga tí tað er bert fjórða hvørt ár, í mun til EM og HM ið bæði eru annaðhvørt ár. 

Sum heimsmeistarar høvdu danir spælt seg til HM fyri langari tíð síðani - januar 2019. Spania (EM 2020), Egyptaland, Argentina og Bahrain hava eisini spælt seg til OL við at vinna meistaraheiti í sínum parti av heiminum. Japan er við sum vertur.

Avgerðin um hinir seks luttakararnir fall í vikuskiftinum, tá teir tríggir undankappingarbólkarnir við fýra liðum í hvørjum bólki spældu seg víðari.

Í Berlin vóru slovenar ov stuttir, og vertirnir og Svøríki spældi seg víðari. Norðmenn og brasliumenn vóru sterkast í Pogdorcia - hetta verður fyrstu ferð í 49 ár, at manslandsliðið hjá Noreg skal spæla á olympisku leikunum.

Tað gjørdist mest spennandi í Montpellier. Kroatia hevði komið víðari, um Portugal ikki hevði megnað at vunnið á Fraklandi í seinasta dystinum, og tað sá út fara gerast veruleiki. Men hóast eina trý-máls leiðslu til heimaliðið í 56. minutti vann Portugal. Menningin hjá liðnum hevur verið stór seinastu árini, og nú skal Portugal til sítt fyrsta OL í manshondbólti. Síðst í februar andaðist doyði sera dugnaliga málverjin Alfredo Quintana, eftir at hann fekk hjartsteðg til venjing hjá FC Porto. Quintana gjørdist 32 ár, og hann varð aftur heiðraður eftir søguliga sigurin í gjár. 

Danmark skulu í Tokyo verja OL-heiti, ið danir fingu í hús í Rio de Janeiro í 2016.

OL-liðini: 
Japan, vertstjóð
Danmark, heimsmeistari
Spania, europameistari
Egyptaland, afrikanskur meistari
Argentina, panamerikanskur meistari
Bahrain, asiatiskur meistari
Týskland, Svøríki, Frakland, Portugal, Noreg og Brasil,  nummar eitt og tvey í undankappingarbólkunum