Oddaliðið skoraði sjey ferðir móti Leeds

Tveir teir fyrstu dystirnir í 17. umfari í Premier League vórðu leiktir í gjárkvøldið. Tað skuldi upprunaliga vera tríggir dystir, men uppgerðin millum Brentford og Manchester United varð útsett, orsakað av fleiri koronutilburðum í United-leguni.

Les eisini: Brentford - Manchester United útsettur

Hitt liðið í Manchester er oddalið og staðfesti so ruddiliga hesa støðuna í gjárkvøldið, tá Leeds vitjaði. Tað er ikki lætt at vera útilið á Etihad. Hetta noyddist Leeds at ásanna í gjárkvøldið. Liðið hjá Marcelo Bielsa var greitt við undilutan leikliga, tá liðini spældu í Manchester í fjør men vann tá 1-2. Hesuferð varð Leeds eisini við undirlutan leikliga og so dyggiliga eisini á máltalvuni. 

Málveitslan hjá Manchester City fór í gongd longu í 8. minutti, tá Phil Foden skoraði. Jack Grealish, Kevin De Bruyne (tvær ferðir), Riyad Mahrez, John Stones og Nathan Aké komu eisini á máltalvuna, og City er í løtuni ávíkavst fýra og fimm stig frammafyri Liverpool og Chelsea. Tey spæla bæði hóskvøldið. Leeds er sum so partur av niðurflytingarstríðnum.

Stevan Gerrard vendi fyri beint yvir einum mánaði síðani aftur til Premier League og í vikuskiftinum aftur til Anfield 

11. november varð Steven Gerrard settur sum venjari hjá Aston Villa. Tá hevði Birmingham-felagið fingið tíggju stig í ellivu Premier League dystum - í teimum seks dystunum síðani hevur Villa vunnið sær tólv stig. Tey bæði tapini hava verið við einum máli - móti Manchester City og Liverpool. Í gjárkvøldið vann Villa 2-0 á útivølli móti uppflytaraunum Norwich, ið eru niðast. Jacob Ramsey legði Villa á odda í 34. minutti, og stutt fyri leiklok staðfesti Ollie Watkins sigurin. Nú eru Gerrard og hansara menn tætt við evropeiskt pláss.

Tað er ein rúgva av Premier League-dystum á skránni í hesum mánaðinum, og fýra afturat eru á skránni í kvøld: 

Týsdagin 14.12 (í gjár)
Manchester City - Leeds United 7-0 (3-0)
Norwich - Aston Villa 0-2 (0-2)

Mikudagin 15.12 (í dag)
19.30: Brighton - Wolves
           Burnley - Watford
           Crystal Palace - Southampton

20.00: Arsenal - West Ham