Oddastríðið gjørdist tættari

Orsaka av úrslitunum í gjár bendi tað á, at stríðið um ovastu plássini fór at gerast harðari eftir umfari. Hetta er eisini veruleikin eftir 14. umfar, tí HB og Víkingur greiddu sína skyldu í dag. Harvið eru trý lið ovast við 32 stigum, B36 er beint í hølunum, og grannarnir hjá teimum og føroyameistararnir eru nú bert fimm stig frá ovastu plássunum.

AB hekk í Víkingi, eftir at útiliðið hevði skorað tíðliga. Men til endans vísti liðið hjá Sámal Erik Hentze rutinu og kynismu og Vatnhamar-brøðurnir staðfestu sigurin. Úrslitið á Argjum hevur við sær, at Víkingur nú er saman við KÍ og NSÍ á 32 stigum og hevur gultan møguleika at leggja seg á odda komandi vikuskifti. Argjamenn eru nú einsamallir á aftasta plássi.


(Sølvi Vatnhamar var við við í øllum málinum hjá Víkingi á Argjum, og Adrian Justinussen skoraði enn eitt frísparksmál, tá HB vann trygt á Skála - Mynd: Jens Kr. Vang)

Hóast Skála hevði góðar royndir og støður í 1. hálvleiki, so var HB bara betri, og skoraði trý frálík mál fyri steðginum. Tvey tey fyrstu vórðu væl sparkaði inn við brotsteigarmarkið og 3-0 málið stutt fyri hálvleik, sum í roynd og veru avgjørdi dystin, var væl gjøgnumspælt. Føroyameistararnir hava funnið seg sjálvar, og Skála klárar ikki heilt at spæla upp ímóti ovaru liðunum í løtuni - hetta var sjeyndi ósigurin á rað hjá teimum appelsinlittu

Í Hólmanum tóktust bæði liðini varin, og av tí sama kom einki mál. Møguleikarnir vóru fáir, hóast ÍF kanska lá nakað meira framvið. Bæði fuglfirðingar og EB/Streymur tóktust rímiliga væl nøgdir við úrslitið, ið hevur við sær at ÍF kemur av aftasta plássi, og at aftastu liðini ikki koma tættari uppá EB/Streym. 

Betrideildin 14 umfar:

AB - Víkingur 0-3 (0-1)
9' Filip Djordjevic 0-1
73' Gunnar Vatnhamar 0-2
79' Sølvi Vatnhamar 0-3

EB/Streymur - ÍF 0-0

Skála - HB 0-3 (0-3)
3' Símun Samuelsen 0-1
25' Adrian Rúnasson Justinussen 0-2
41' Dan í Soylu 0-3

Í gjár:
B36 - NSÍ 1-1 (1-0)
21' Michal Przybylski 1-0
92' Jóhan Troest Davidsen 1-1

TB - KÍ 1-0 (0-0)
73' Teitur J. Olsen 1-0

Støðan í Betrideildini: 
1. NSÍ (32 stig) 
2. KÍ (32 stig) 
3. Víkingur (32 stig)
4. B36 (31 stig) 
5. HB (27 stig) 
6. Skála (15 stig) 
7. TB (15 stig) 
8. EB/Streymur (8 stig)
9. ÍF (5 stig) 
10. AB (4 stig)

* Komandi umfar: 

(FSF)

* Hetta er seinasta umfar undan summarsteðginum - Dystirnir hjá KÍ og B36 (ímóti ávíkavist B36 og ÍF) eru fluttir orsakað av luttøkuni hjá KÍ og NSÍ í Europa League komandi vikuna