Ingi Samuelsen
Pætur Petersen, áleypari hjá HB, er møguliga á veg til danskan fótbólt.
Danska fótbóltsfelagið Esbjerg fB skrivar í dag, at tey hava tríggjar útlendskar leikarar til royndarvenjing hesa vikuna, og at ein av teimum er HB-leikarin, Pætur Petersen.
Tað er ikki so langt síðani, at Esbjerg spældi í Superliguni, men seinnu árini hevur ikki gingist væl hjá Esbjerg.
Eftir tvey ár í næstbestu deildini, mátti felagið úr Esbjerg í fjør ta tungu leiðina niður í triðbestu deildina, sum eitur 2. division.
Her hevur gingið betur. 16 umfør eru spæld í inniverandi kappingarári, og Esbjerg liggur her í vetrarstøðginum ovast á stigatalvuni saman við Aarhus Fremad við 36 stigum.
Venjari hjá Esbjerg fB er Lars Vind. Hjálparvenjarin er meira kendur, nevniliga niðurlendingurin Rafael van der Vaart.
Vinarliga broyt tínar kennifíla - og privatlívsstillingar fyri at síggja hetta innihald