Fótbóltur

Palli Augustinussen legst afturat venjaratoyminum hjá FC Suðuroy

Vágbingurin hevur drúgvar royndir sum spælari og hevur eisini verið venjari í fleiri ár. Palli hevur A-prógv, og harvið er lokala venjaratoymið hjá uppflytaranum fullfíggjað.

Palli Augustinussen er aftur í venjaratoyminum hjá besta liðnum í sunnara hálvu av Suðuroynni - her saman við formanni felagsins Eyðbjørn Thomsen (Mynd: FC Suðuroy)

2025-02-27 13:55

Agnar Prestá

Í fjør var tað við Pól Thorsteinsson sum høvuðsvenjara og Kára í Lágabø sum hjálparvenjara, at FC Suðuroy - sum uppflytari í 1. deild - flutti upp.

Til tilveruna í Betrideildina er neyðugt at hava ein venjara í venjaratoyminum við A-útbúgving. Hetta hevur høvuðsvenjarin Pól Thorsteinsson ikki. Hann hevur annars leitt liðið til tvær uppflytingar á rað.

Palli Augustinussen, sum hevur verið ógvuliga virkin í felagnum, er A-venjari. Hann er nú lagdur afturat Pól og Kára. FC Suðuroy víðar venjaratoymi hjá besta liðnum, sum skal undir eina stóra avbjóðing.

Palli Augustinussen vann millum annað FM í 2000 og var venjari hjá besta liðnum hjá FC Suðuroy frá 2020 til og við 2022 - í 2021 var liðið í 1. deild. Í fjør stóð Palli á odda fyri næstbesta liðnum, sum er í 2. deild.

Hann er pápi liðformannin á liðnum, Pætur Augustinussen.

- Onkur meinar, at Palli nokk er føddur á Eiðinum og hevur gingið har síðan, men tað er gleðiligt, at vit til hetta kappingarárið hava fingið ein slíkan kapacitet enn meira knýttan okkara mansliði, sum í næstu viku fer undir eitt nýtt kappingarár - nú í Betri Deildini, skrivar felagið í dag.

FC Suðuroy flutti upp sum nummar tvey í 1. deild í fjør.

Vinarliga broyt tínar kennifíla - og privatlívsstillingar fyri at síggja hetta innihald