Rakti øll skotini í fyrstu kappingini

Ungi grønlendski skíðskjúttin, 20 ára gamla Ukaleq Slettemark, kláraði seg væl í dag, tá hon var við í síni fyrstu olympisku kapping.

Hon kappaðist í 15 kilometra teininum, og megnaði at raka øll 20 skotini. Tað var bert ein annar skíðskjútti, sum eisini kláraði tað.

Úti á sporunum gekst tó ikki eins skjótt og tey bestu. Ukaleq Slettemark brúkti tíðina 50 minuttir og 4 sekund, sum gav henni aitt pláss sum nummar 53 av teimum 87, sum vóru við í kappingini.

Denise Herrmann vann framman fyri Anais Chevalier-Bouchet, ið fekk silvur og Marte Olsbu Roeiseland úr Noregi, sum fekk bronsu. 

- Eg eri sera nøgd við at raka 20 ferðir. Tað var feitt, men tað gekk ikki so væl úti á sporinum, segði ein ógvuliga móð Ukaleq Slettemark við Ritzau eftir kappingina.

Ukaleq Slettemark er millum yngstu luttakararnar í OL-kappingini í skíðskjóting.

Fríggjadagin er hon við í sprintkappingini, tað er 7,5 milometrar. Er hon millum 60 tær skjótastu í teirri kappingini, sleppur hon eisini við í sokallaða jaktstartin á 10 kilometrar.

Grønland hevur somu støðu sum Føroyar í olympiskum samanhangi, og tí luttekur Ukaleq Slettemark sum dani.

Pápi hennara, Øystein Slettemark, hevur eisini luttikið í OL undir donskum flaggi. Tað var í Vancouver í 2010 har eitt 86. pláss var hansara besta.

í 2019 vann Ukaleq Slettemark gull í 10 kilometrum í heimsmeistarakappingini fyri juniorar í Slovakia. Hon býr í Noregi og venur saman við norska ungdómslandsliðnum.