Rannvá setti NSÍ upp á pláss við perlu

NSÍ vann VFF Cup herfyri, men í gjár lat KÍ ongan iva um hvør tað var, sum vann alt sum kundi vinnast kappingarárið í fjør.

Greipuvinnararnir vunnu 4-1 móti nærmasta kappingarneytanum úr NSÍ í stórsteypadystinum á Tórsvølli í gjár.

Tríggjar minuttir inn í dystin legði Malena Olsen KÍ á odda 1-0. Tá eitt sindur meira enn ein tími var leiktur økti Victoria á Lakjuni til 2-0, og lítla løtu seinni Rannvá Biskopstø Andreasen til 3-0.

Tað eydnaðist Margunn Lindholm at minkað um munin fyri NSÍ tá 77 minutttir vórðu leiktir, men beint fyri leiklok fekk Rannvá Biskopstø Andreasen pláss uttanfyri sekstanmeturin og smekkaði til.

4-1 til KÍ, sum kundi lyfta stórsteypið. Lions Club Tórshavn skipar sum vant fyri Stórsteypadystinum, og peningurin fer í ár til átakið “Øll hava rætt til góð barnaár”, sum Blái krossur varðar av. 

Landskappingin hjá kvinnum byrjar næsta vikuskifti, og tá hittast júst hesi liðini aftur. Tá verður tað í Klaksvík.

KÍ kv. - NSÍ kv. 4-1 
3' Malena Olsen 1-0
65' Victoria á Lakjuni 2-0
68' Rannvá Biskopstø Andreasen 3-0
77' Margunn Lindholm 3-1
88' Rannvá Biskopstø Andreasen 4-1

(Kelda: Dystir.fo)

1. umfar hjá kvinnum verður spælt soleiðis:

Leygardag 20. mars
07 Vestur-HB
EBS/Skála-AB/B71

Sunnudag 21. mars
KÍ-NSÍ
B36-Víkingur