Rógvi Baldvinsson er nú givin á høgum stigi

Ein av teimum sum fyrr í ár umboðaði føroyska A-landsliðið við monnum er nú givin at spæla fótbólt - í øllum førum á høgum stigi.

Talan er um Rógva Baldvinsson, sum í síðstu viku hevði 34-ára føðingardag. Tað eru 13 dagar síðani, at Rógvi spældi sín seinasta dyst. Tað var play-off dysturin móti Kristiansand, sum í vikuskiftinum flutti upp i bestu norsku deildina. Hann endaði við tapi eftir brotssparkskapping.

Sí hvat brynefk.no skrivar her

Síðani 2017 hevur miðverjin/verjukendi miðvallarin umboðað Bryne FK, sum í 2020 flutti upp til næstbestu deildina. Hann spældi eisini við felagnum í 2013. Felagið, har Erling Haaland vaks upp, er tað, sum Rógvi Baldvindsson hevur spælt flest vaksnamannadystir fyri. Algård hevur hann eisini umboðað nógv. Tað er felagið, sum havnarmaðurin spældi við fyrstu árini.

Rógvi Baldvinsson varð føddur í Føroyum 6. desember í 1989. Hann hevði helst umboðað B36, um familjan ikki varð flutt til Noregs. Hetta var, tá Rógvi var fimm-ára gamal. Hann hevur ongantíð umboðað eitt føroyskt felag, men í 2010 spældi sterki spælarin tveir U21-landsdystir og skoraði eitt mál - í 3-1 sigrinum á Andorra.

Árið eftir fekk tá 21-ára gamli Rógvi Baldvinsson møguleikan á A-landsliðnum: Fyrsti dystur var móti Slovenia á Svangaskarði fyri í juni. í 2011, og seinni tað árið var millum annað Italia á skránni. Hann var mest í miðverjuni og var mest fastur maður fyrsti árini á landsliðnum.

Rógvi spældi tó til dømis allar tíggju dystirnar í EM-undankappingini í 2019. Størsta løtan á landsliðnum var helst sigursmálið móti Malta á Tórsvølli tað árið: Rógvi stútaði bóltin í málið eftir hornaspark eftir 70 minuttir í tí, sum var seinasti heimadystur hjá Lars Olsen og Atla Gregersen. Hetta vóru samstundis einastu føroysku stigini hesa undankappingina.

Myndir: Sverri Egholm

Hann hevði ein serstakan eginleika í luftspæli og í deyðbóltunum. Rógvi Baldvinsson var áleypari sum ungdómsspælari og fyrstu vaksnamannaárini og skoraði 4 mál í 52 A-landsdystum. Tað er gott fyri ein verjukendan spælara hjá Føroyum. Umframt omanfyrinevnda sigursmál, skoraði hann á venjingardysti á Malta í 2013 og so vóru tað tvey eyðkend mál eftir lang innkøst: Leiðslumálið á Tórsvølli móti Svøríki í 2012, og til 2-1 niðri í Portugal í 2017 tá Cristano Ronaldo gjørdi hattrikk. Bæði vóru fluktarar.


Málið hjá Rógva móti Svøríki, ið kundi givið Føroyum serstøk og søt stig (Youtube: Hans Erik Danielsen)

Samanlagt gjørdist talan um 52 A-landsdystir og fýra mál hjá Rógva Baldvinsson. Tveir teir seinastu komu í ár: Hann byrjaði inni í miðverjuni í venjingardysti í Norðurmakedónia í mars og kom á vøllin til seinastu minuttirnar í 0-3 heimatapinum fyri Kekkia í juni. Síðani hevur verjukendi spælarin ikki verið úttikin.

Umframt at spæla fótbólt í næstbestu og triðbestu norsku deildini seinastu mongu árini, hevur Rógvi verið útvarpsvertur, og er hann væl lýddir í Noreg. Tann leiðin eigur sín leiklut í avgerðini í at gevast, men eru tað eisini mongu skaðarnir. Tað avdúkaði Rógvi Baldvinsson fyri bolt.fo í gjárkvøldið: 

- Tað er ein samanseting av ymiskum. Tey seinastu trý árini havi eg verið nógv skaddur, og so eri eg 34 ár, so uppvenjing aftaná skaða hevur tikið eitt sindur av tíð. Samstundis hava vit ein ungan miðverja sum er ordiliga ’’up and coming’’, so min tið er komin. So havi eg eisini onnur ting uttanfyri vøllin, sum er ordiliga spennandi - so eg avgjørdi, at nu var nokk. Sjálvandi er tað serligt, men eg hevði møguleikan at leingja eitt ár, so tad er gott at steðga sjálvur og ikki bliva ’’kastaður’’ vekk, tí man er ov gamal.

Tøl: Fótbóltssamband Føroya og FaroeSoccer