Taka ímóti Rumenia í kvøld

Føroyska flogbóltslandsliðið hjá kvinnum spældi sunnudagin sín fyrsta dyst í Eurovolley EM-undankappingini. 

Hesin dysturin var í Kroatia og greitt var, at talan fór at verða um eina ógvuliga torføra uppgávu. Soleiðis varð eisini. Føroyar taptu 25-8 í fyrsta settinum, men tað gjørdist betri í 2. setti og uppaftur betri í 3. setti í Osijek, har munurin var tíggju bóltar.

Føroyski hópurin í Kroatia (Mynd: CEV)

Hjá monnunum, ið nú eru lidnir við sína undankapping, gjørdust úrsltini betri og betri fyri hvønn dysti, og í kvøld fáa kvinnurnar aftur ein møguleika, tá Rumenia vitjar. 

Talan er eisini um eitt sterkt lið, men hesuferð hava okkara so heimavallarfyrimunin. 

Umframt Kroatia og Rumenia, skulu Føroyar eisini spæla ímóti Ísrael í hesari undankappingini.

Dysturin í Høllini á Hálsi í kvøld byrjar klokkan 19. Til ber at keypa atgongumerki her. Dysturin kann síggjast hjá Televarpinum


Føroyska liðið til dystin í kvøld (Mynd: FBF)