Tórður spælir fyri barndómsfelagið næsta kappingarár

Tórður Skorheim Guttesen, sum fyri ein part av farna kappingarárið var í lestrarørindum í Danmark og sum kom heim aftur at spæla fyri Kyndil móti kappingarenda, hevur nú gjørt av at vera verandi í Føroyum eftir summarfrítíðina.

Hetta skrivar Kyndil á Facebook-síðu sínari, og tað fegnast tey sjálvandi um í felagnum.

23-ára gamli Tórður Guttesen er landsliðsmálverji og skal í 2021/2022 royna at fáa Kyndil hægri upp á stigatalvuna. Liðið endaði í fjør næstaftast í grundspælinum, og fekk eins og StÍF átta stig fyri 18 dystir.