Tottenham vann seg uppá 2. plássið

Fyrsti dysturin í 25. umfarið varð leiktur á Wembley, har Rafa Benitez og Newcastle vóru á vitjan og skuldu royna at endurtaka bragdið frá týskvøldinum, tá liðið úr Norðuronglandi vann á einum av liðunum í oddinum. Tá var tað ímóti Guardiola og City, í dag var tað ímóti Pochettino og hansara heldur skerda Tottenham-liðið uttan Kane og Alli.

Benitez royndi seg við sama taktikki sum seinast: 5-4-1 leikskipan, standa djúpt og kompakt, avvísa og síðani satsa uppá at skapa møguleikar við mótálopum og deyðbóltum. Hjá Newcastle eydnaðist eisini at halda málið reint leingi, hóast heimaliðið søkti at, legði tungt trýst til tíðir og kom fram til nakrar stórar málmøguleikar.

Í 1. hálvleiki skuldi Lucas Moura lagt Tottenham á odda, tá hann kom at standa púra fríur, men stútarin fór onkursvegna framvið. Lucas hevði ein annan stútara, sum fór uppum, og Lamela rakti yvirleggjaran, tá hann royndi seg við høvdinum. Í 2. hálvleiki var tað Rondon, ið stútaði men rakti træverkið (stólpan). Størsta møguleikan átti tó Tottenham, tá Christian Eriksen stýrdi bóltin framvið Dubravka, men á sjálvari málstrikuni ruddaði Fabian Schär bóltin burtur. Mállinjutøknin vísti, at bólturin akkurat ikki var innanfyri.

Tað liktist einum málleysum javnleiki, men í 83. minutti fekk heimaliðið løn fyri yvirvágina og stríðið, tá Son royndi seg beint uttanfyri brotsteigin og Dubravka ikki megnaði at halda bóltinum. Harvið avgjørdi Tottenham triðja dystin á rað innanfyri seinastu tíggju minuttirnar og vann sær trý týdningarmikil stig afturat, ið gera at Tottenham fyribils er nummar 2 - fýra stig aftanfyri oddaliðið Liverpool. 

Tottenham - Newcastle 1-0 (0-0)
1-0 83.min Son Heung-Min

Hesir seks dystirnir eru á skránni seinni í dag: 

15.00: Brighton - Watford
           Burnley - Spouthampton
           Chelsea - Huddersfield
           Crystal Palace - Fulham
           Everton - Wolves 
          
17.30: Cardiff - Bournemouth 

Dagførd 3. februar kl. 11.32