Vænta upp ímóti 25 hitastigum í Podgorica í dag

FSF: Klokkan hálvgum fýra seinnapartin skal kvinnulandsliðið aftur í eldin. Hesaferð á útivølli móti Montenegro, sum í sínum fyrsta dysti í undankappingini vann stórsigur á Andorra

Eftir eitt tepurt 1-0 tap fyri Grikkalandi fyri fýra døgum síðani, er EM-undankappingardystur aftur á skránni í dag – hesaferð á útivølli móti Montenegro. Føroyska liðið stóð seg væl ímóti grikkum, og kann heilt víst taka nógv gott við sær, nú ein nýggj avbjóðing stendur fyri framman.

Les eisini:  Montenegro tekur aftur ímóti seinnapartin

Dagsins mótstøðulið er ikki ókent fyri okkara kvinnur. Í Nations League kappingini í fjør, tá Føroyar og Montenegro vóru í bólki saman, var upplivingin hjá okkara kvinnum tó einki serlig – serliga ikki í seinna dystinum, sum montenegrisku kvinnurnar vunnu stórt (9-0, red.)

Á nýggjasta styrkislistanum hjá FIFA er Montenegro nummar 89, nakað frammanfyri Føroyar, sum er nummar 110 av teimum 193 londunum, ið eru á listanum hjá altjóða fótbóltssamgonguni.

Føroyski hópurin kom úr Grikkalandi til Montenegro seint leygarkvøldið, og síðani hava tvær venjingar og nakrir fundir verið á skránni. Sum heild eru allar væl fyri til dystin í dag, ið væntandi verður spældur í nógvum hita – møguliga eini 20-25 hitastigum.

Tær í føroyska hópinum hava so fingið vant seg eitt sindur við umstøðurnar (Mynd: Fótbóltssamband Føroya)

EM-undankappingardysturin á Gradski Stadion í Podgorica millum Montenegro og Føroyar verður floytaður í gongd klokkan 15:30 føroyska tíð og kann stroymast beinleiðis á heimasíðuni hjá Kringvarpi Føroya.