Vár fær spælitíð í morgin

Hóast dysturin móti Paraguai í morgin hevur stóran týdning fyri víðari HM kappingina hjá Føroyum, so er greitt, at Føroyar ikki fara at spæla í sterkastu uppstilling alla tíðina í dystinum.

Í skrivandi løtu vita vit enn ikki hvørjar leikarar, sum venjararnir Claus Mogensen og Simon Olsen, velja ikki at hava við á dómaraseðilin í morgin.

Men vit skulu til dømis rokna við at síggja tvíburasystrina Vár Zachariassen meira á vøllinum í morgin.

Tað segði Mark Marcher-Lausen, ítróttastjóri í HSF, í samrøðu við Pætur Nolsøe í beinleiðis sending í FM1 fyri løtu síðani.

- Vit fara at síggja Vár meira á vøllinum móti Paraguai í staðin fyri Pernille, sum sleppur at hvíla seg eitt sindur.

Tí skulu vit rokna við at síggja tvíburasystrarnar Vár og Lív Zachariassen saman í miðverjuni móti Paraguai.

Lív er annars fastur miðverji, hevur staðið í verjuni í báðum dystunum, sum higartil eru spældir, men hon er ikki við í álopi uttan í allarfyrstu fasu í skjótálopum.

Systirin Vár er eisini stinnur verjuspælari, men verður í landsliðshøpi eisini brúkt á strikuni sum triðja val eftir Pernillu Brandenborg og Bjartu O. Johansen.