Hondbóltur

Vestmenningar kunnu aftur tevja gull

Menninir hjá VÍF kunnu í kvøld tryggja sær sítt fyrsta føroyameistaraheitið síðani 2016, men til tað krevst ein sigur í Hoyvík, har FM er endað seinastu árini.

VÍF og H71 skulu í kvøld stríðast í fjórðu FM-finaluni, sum kann gerast tann seinasta (Mynd: Sverri Egholm)

VÍF og H71 skulu í kvøld stríðast í fjórðu FM-finaluni, sum kann gerast tann seinasta (Mynd: Sverri Egholm)

2021-04-21 15:58 Author image
Agnar Prestá
placeholder

Í 2015 vunnu vestmenningar greipuna, og árið eftir gjørdist VÍF aftur føroyameistari í fremstu mansdeildini - hetta var nummar 23 í røðini hjá besta mansliðnum hjá VÍF. Síðani hava vestmenningar kunna fegnast um gull á kvinnusíðuni, men menninir hava ikki megnað at enda á ovastu rók seinastu fimm árini.

Møguleikin er nú av álvara til staðar. VÍF er á odda 2-1 í finalum, og um tað ikki eydnast í Hoyvík í kvøld, so skal tað avgerast í Vestmanna leygardagin, og har hava teir í gulum og bláum av álvara víst styrki í ár - millum annað í finalu nummar eitt og finalu nummar trý, ið var leygardagin. 

Filip Jojic var darvaður av fingrinum í vikuskiftinum, men í hesum finalunum hava fleiri vestmenningar av álvara traðkað fram. Nú tá tað kann avgerast, er heilsustøðan hjá Filipi tó av stórum týdningi, og tað sama er við Mladen í málinum, sum hevur verið darvaður av økslini.

[object Object]

H71 tók yvir fyri VÍF, og hevur síðani 2016 vunnið sjey steyp - fýra steypakappingar og trý FM-heiti. Í fjør sóu hoyvíkingar eisini sterkast út, tá landskappingin steðgaði orsakað av koronu. Liðið hjá H71 er ikki eins sterkt í ár, men har er avgjørt nógv góðska, og leikararnir eru vanir við at vinna. Hetta kann gerast ein fyrimunur.

Í kvøld snýr tað seg um hjá H71 at tryggja, at tað verður ein fimta finala. Lagt er upp til ein javnan dyst - kanska verður tað eins og fyri viku síðani, tá neyðugt var við brotskastskapping fyri at finna ein vinnara í Hoyvík.

Fyrsta brískl verður klokkan 20. Portalurin verður á staðnum og hevur fleiri myndir og videobrot, umframt at vit taka samanum finaluna. Dysturin kann síggjast í Kringvarpinum, og FM1 hevur beinleiðis frásøgn. 

Les eisini: Kann gerast søguligt kvøld á Skála


Fjórða FM-finalan í Okkara-deildini
21.04 
H71 (1) - VÍF (2)

placeholder
placeholder