Video: - Teir tímarnir døgnið hevur, fara stórt sæð allir til fyrireiking

Í morgun fór ferðalagið hjá KÍ til Dublin, har helst størsta uppgávan í søgu felagsins bíðar teimum: KÍ skal hóskvøldið spæla ímóti írsku meistarunum, Dundalk, um at koma í bólkaspælið í Europa League.

Tað kann verða avgjørt uppá 90 minuttir, eftir longda leiktíð (120 minuttir) ella við brotssparkskapping, um tað framvegis stendur á jøvnum tá. Júst brotsspørk hava Mikkjal Thomassen, Geza Turi og teir á KÍ-liðnum sjálvandi fyrireika seg uppá, og í samrøðu við Portalin undan fráferð lýsti høvuðsvenjarin hjá KÍ, hvussu fyrireikingarnar til playoff-dystin fara fram og hvussu stórt arbeiði venjaratoymi leggur í tær - tó uttan at leikararnir fáa ov nógva kunning, og at teir verða "yvirfyrireikaðair".

Dentur verður lagdur á, at talan er ein fótbóltsdyst, har KÍ hevur ein góðan møguleika at vinna - ikki á hvat ein sigur kann føra til o.s.fr, tí tað kann verða millum tað mest vandamikla at hugsa um áðrenn dystin, sigur royndi venjarin.

44-ára gamli venjarin hevur ført KÍ til ein sigur í finaluni í kappingini um Løgmanssteypið í 2016 og í "FM-finaluni" móti B36 í Gundadali í fjør - eitt felag sum Mikkjal hevur vunnið FM við sum leikari og venjari, og har hann í 2005 og 2006 var við til at skriva søgu sum leikari í ávíkavist Uefa Cup og Champions League.

Slíkt hugsar maðurin ikki um nú, og í samrøðuni vísur hann á, at "leikararnir kunnu reypa, tá teir eru gamlir".

Hjá honum fór fokus eisini beinanvegin hóskvøldið, eftir 6-1 sigurin á Dinamo Tbilisi, til næstu uppgávuna, og Mikkjal Thomassen sigur, at hann millum annað hevur ligið vakin leingi onkra nátt og hugsað ymiskt ígjøgnum í mun til dystin.

Samrøðan við Mikkjal Thomassen varð tikin upp í heimi hansara í Hoyvík í gjár. KÍ-hópurin fyrireikar seg nú í Írlandi.

Sí eisini: Mikkjal eftir 6-1 sigurin: Eg kann royna at greiða frá hvat hendi