- Eg skal blíva ein meira sentralur partur av einum hópi

Meinhard Egilsson Olsen skifti í vetur til norskan fóltbólt – úr B36 til Kristiansund BK sum spælir í Eliteserien í Noreg. 22-ára gamli álopskendi leikarin fór tá undir sítt annað ævintýr uttanlanda.

Meinhard - her í dysti móti Pogba og United á Ullevaal (Mynd: kristiansundbk.no)

Tíðliga í mai gjørdist Meinhard matchvinnari í tveimum dystum á rað – einum steypadysti og í einum dysti ímóti Tromsø. Síðani hava ljóspunktini tó verið heilt fá á vøllinum. Meinhard Olsen spældi í venjingardysti móti Machester United í juli, men spælitíðin hevur  í høvuðsheitinum verið lítil: 11 dystir og 252 minuttir í Eliteserien. Meinhard sigur við Portalin, at tað bendir ikki á, at hann heldur fram í Kristansund, hóast ein møguleiki er fyri tí:

- Sáttmálin hjá mær við KBK gongur út 31.desember, og eg havi avtala vid felagið at vit taka eitt prát ta kappingin er lidug (seinasta umfar er nú í vikuskiftinum. Red). Tað sær tó út til at tað eru fleiri møguleikar i spæl hjá mær. At leingja her er ikki óhugsandi, men so skal eg fáa onnur signalir, enn tey eg havi fingið frá felagnum nú.

Meinhard hevur áður spælt við Vendsyssel í næstbesti donsku deildini, og hann váttar, at har er áhugi fyri honum í Skandinavia - eisini úr Føroyum. Fyri leikaran er tó lívið sum yrkisleikari, ið stendur ovast á listanum, og avgerðin um framtíðin verður tikin einaferð í komandi mánaði:

- Eg havi onnur felag í teimum flestu skandinavisku londunum, íroknað Føroyum, sum hava kontakta meg. Eyguni hjá mær eru fyrst og fremst rætta móti útlandinum og einum sáttmála sum yrkisleikari.


Meinhard spældi fyri B36 í seinnu hálvu av 2017 og alt 2018. Júst B36 hevur verið nevnt sum eitt møguligt felag, har kviki leikarin fer at spæla í 2020. Grannarnir HB og KÍ hava eisini verið sett í samband við Meinhard Olsen (Mynd: Sverri Egholm)

Menningin og spælitíðin eru lyklaorðini hjá Meinhardi Egilssyni Olsen, og hann vil millum annað gera vart við seg á A-landsliðnum, har hann fekk debut fyrr í ár móti Spania: 

- Mest umráðandi fyri meg er, at eg i 2020 eri eitt stað, har eg mennist, og har eg kann fáa meira spælitíð enn eg havi fingið í ár. Eg skal blíva ein meira sentralur partur av einum hópi, soleiðis at eg kann mynda dystir og koma aftur til at skora mál og gera meg galdandi undir nýggja landsliðsvenjaranum