- Spennandi og áhugaverdur bólkur

- Hetta bleiv eitt sera spennandi og áhugavert lutakast fyri okkum. Enn kenni eg ikki so nógv til okkara mótstøðulið, og dugi illa at meta um okkara møguleikar. Men fyrireikingarnar fara í gongd beinanvegin, sigur Eli Hentze, U21-landsliðsvenjari.

Tað er einki at ivast í, at eins og í undankappingini hjá A-landsliðnum, sum eisini skal spæla móti Spania, so eru spaniólar favorittar í bólki 6, tá talan er um komandi EM-undankapping fyri U21-landslið.

- Spaniólar hava altíð góð landslið, og teir verða uttan iva ringir at sifta. Hini londini eru eisini sterk, men er okkara innsatsur í lagi, so klára vit uttan iva at geva teimum veruliga mótstøðu – eisini Spania. Málið er sjálvandi at vinna so nógv stig sum tilber, sigur Eli Hentze við heimasíðuna hjá FSF.