14 ára gamli Líggjas Joensen skal bera vatnið

Í kvøld verða 19. oyggjaleikirnir settir á ermasundsoynni Guernsey.

Mest sermerkti parturin av setanarhátíðarhaldinum er vanliga fasti tátturin, tá ein íðkari frá hvørjari limaoyggj letur vatn heimanífrá í eitt felags kar. Vatn – sjógvur – er tað, ið bindir oyggjarnar í hesum samstarvi saman, og tí hevur tað verið siður, at oyggjarnar hava eitt ílat við vatni við sær.

Í Føroyum hevur verið siðvenja, at tað er yngsta ítróttafólkið, ið ber vatnið.

Til hesar leikirnir er 14 ára gamli svimjarin, Líggjas Joensen, yngsta ítróttarfólkið, umboðandi Føroyar, og tí fær hann heiðurin at bera vatnið til oyggjaleikasetanina. Føroyskur flaggberi verður borðtennisleikarin og -venjarin, Peter Niclasen.

Oyggjaleikirnir á Guernsey verða settir í kvøld kl. 18:30 á havnalagnum í St Peter Port.