Aftur H71 og Neistin í finaluni

Tað bleiv ongantíð tann veruligi spenningurin í seinnu hálvfinaluni millum H71 og VÍF. Frá fyrru hálvfinaluni millum liðini vóru hoyvíkingar á odda 33-24, og tí skuldi nógv til at koppa H71.

Hetta hendi heldur ikki, og í hálvleikinum var støðan 15-10 til H71. Tað vil siga at munurin var 14 mál.

Dysturin endaði við einum 27-23 sigri til H71, sum sostatt spældi seg í steypafinaluna.

Steypafinalan 2021 (Mynd: Jens Kr. Vang)

Mótstøðuliðið verður eins og í fjør Neistin. Tað gjørdist greitt í dramatikki í Kollafirði leygarkvøldið. KÍF vann fyrra dystin í Havn 26-25, og tí var spenningurin í hásæti tá liðini hittust aftur í seinnu og avgerandi hálvfinaluni.

Úrslitið gjørdist ikki greitt fyrr enn í allar seinasta sekundi, tá neistamenn fingu brotskast. Ágúst Ingi Óskarsson misnýtti ikki møguleikan, og sendi bóltin í netið til 27-26 til Neistan. Samlaða úrslitið gjørdist javnt 52-52, men Neistin hevði fleiri útivallarmál.

Finalan hjá monnum, sum er ein endurtøka frá í fjør, verður leikt næsta leygardag, 19. februar. H71 hevði munin í fjør og vann eftir longda leiktíð.

Hjá kvinnum eru tað H71 og Kyndil sum hava spælt seg í steypafinaluna, sum verður leikt 19. mars.