Alda Nielsdóttir
ÍSF hevur sett Onnu Mariu Toftegaard í starv sum samskipara á Føroyaleikir 2022.
Anna Maria er 23 ára gomul og ættað úr Fuglafirði. Hon starvast í dag sum leiðari á ungdómsdeildini hjá Betri, og hetta starvið kemur hon framhaldandi at røkja saman við samskiparastarvinum hjá ÍSF.
Anna Maria hevur altíð verið virkin innan ítrótt og spælir í løtuni fótbólt við 1. deild hjá ÍF og flogbólt hjá 1. deild hjá Fleyr. Anna Maria er tí virkin innan ymiskar ítróttagreinar og hevur eisini stóran áhuga fyri ítrótti í breiðum høpi, skrivar ÍSF á heimasíðuna.
– Í Fuglafirði blóma nógvar ítróttargreinar, og haldi meg hava roynt allar, men serliga er tað fimleikurin, sum hevur fylt mínar dagar, sigur hon.
Seinastu trý árini hevur Anna Maria verið knýtt at Havnar Fimleikafelag, har hon hevur virkað sum venjari í estetiskum kappingarfimleiki, samstundis sum hon hevur verið við í arbeiðinum um, at samskipa fimleikafagnaðin við Havnar Fimleikafelag.
Anna Maria byrjaði í starvinum 1. desember.
Vinarliga broyt tínar kennifíla - og privatlívsstillingar fyri at síggja hetta innihald