Agnar Prestá
Tað eru nú ellivu dagar síðani hendingarnar í Klaksvík, har Árni Frederiksberg ertaði, og Meinhard Debes Geyti og Sigfríður Clementsen síðani fingu reytt kort.
Leikbannið hjá Meinhardi verður ikki longur enn tann eina dystin, meðan venjari hansara í EB/Streymi ikki er í somu støðu.
Sambært bolt.fo hevur Sigfríður Clementsen fingið tríggjar dystir afturat - samanlagt fýra dystir í venjarabanni frá FSF - fyri at vísa sína ónøgd móti dómaranum Heina Ziskason Viðoy. Millum annað var tað við at venjarin víst ikki bara aðru longutong men báðar longutengur sínar.
Bíðistøða í mun til Árna Frederiksberg - vænta eina niðurstøðu skjótt
Málið við venjarnum hjá EB/Streymi varð ikki viðgjørt í Aga- og Etiskunevndini. Hetta tí at hann fekk reytt kort í støðuni. Har vektaði dómarafrágreiðingin helst mest.
Málið við Árna Frederiksberg fór víðari fríggjadagin. KÍ-spælarin fekk ikki reytt kort í dystinum 30. mars, men støða skal takast til møguligt leikbann eftir kæru frá EB/Streymi.
Síðani tá hevur KÍ spælt tveir dystir, og Árni Frederiksberg hevur spælt fulla tíð og verið við í málum í sigrunum móti B68 (Betrideildin) og HB (steypakappingin).
Úr FSF frætta vit, at umsitingin koyrdi málið víðari til Aga- og Etiskunevndina - sum bert kemur upp í leikin í serstøkum førum - við tí áseting, at tað skuldi ganga so skjótt sum gjørligt.
Tó verður eingin tíðarfreist sett á í slíkum førum. Nevndin er á ein hátt uttanfyri FSF.
Væntað verður tó, at ein niðurstøða fyriliggur skjótt. Aganevndin hevði fund í gjár, fær Portalurin staðfest - í summum førum verður ein niðurstøða gjørd og so gjøgnumgingin einaferð afturat dagin eftir, áðrenn hon verður latin víðari til FSF.
KÍ og Víkingur spæla í Klaksvík leygardagin, og tað vildi í øllum førum verið uppá sítt pláss at havt eina niðurstøðu í málinum áðrenn hetta. Hetta er sum skilst ikki so ósannlíkt, men einki kann sigast við vissu enn.
Videoupptøkur kunnu nýtast í málinum.
Um so er, at Árni Frederiksberg fær leikbann, so kann tað bert fara víðari til Yvirkærunevndina, um tað er eitt leikbann á yvir fimm dagar.
Vegleiðing um hvat leikbann vanliga verður givið fyri sæst her
Vinarliga broyt tínar kennifíla - og privatlívsstillingar fyri at síggja hetta innihald