Ingi Samuelsen
Evnaríki ungi hondbóltsspælarin av Strondum, Bjarni í Selvindi, fer komandi kappingarár at vísa síni kynstur í bestu norsku hondbóltsdeildini.
Hann gerst liðfelagið hjá Helga Hoydal og Tróndi Mikkelsen í KRS Topphåndball í Kristiansand.
Felagið spældi farna vikuskiftið tveir venjingardystir móti Sandnes, og her fekk Bjarni í Selvindi høvi at vísa sínar dygdir fyri venjarunum Victor Skillhammar og Robin Rosander Haugsgjerd, skrivar felagið á Facebook.
Fyrr í summar varð kunngjørt, at landsliðsleikarin Tróndur Mikkelsen flutti til KRS Topphåndball. Hann kom frá Ryger í Stavanger.
KRS Topphåndball spælir sín fyrsta dyst hetta kappingarárið leygardagin á útivølli móti Fjellhammer IL.
Farna kappingarár spældi Pauli Mittún við KRS Topphåndball. Hann er nú farin til Danmarkar, har hann spælir við Team Sydhavsøerne.
(Tekstur broyttur kl. 0945 - um at Tróndur Mikkelsen eisini er partur felagnum)
Vinarliga broyt tínar kennifíla - og privatlívsstillingar fyri at síggja hetta innihald