Bjørk og Karin á All Star-liðnum

Føroyska U-19 landsliðið hjá kvinnum var í síðstu viku í Litava og spældi EHF Championship. Hendan kappingin er fyri lið, ið ikki vóru við til EM-endaspælið. Føroyar høvdu møguleika at vinna gull og vinna seg nærri HM-plássið næsta ár, men Spania vann stórt í finaluni.

Les eisini: Spania alt ov sterkt í finaluni

Føroyar fingu silvur við heim, og tvær á liðnum fingu eisini persónligan heiður eftir heiðursmerkjahandanina. Talan var um Karin Egholm og Bjørk Franksdóttir Joensen.

Karin er úr Hoyvík. Hon spældi á høgra vongi og gjørdi serliga vart við seg í dramatisku hálvfinaluni móti Slovenia. Tá gjørdist hon toppskjútti við átta málum og dagsins spælari. Sambært Handballstatz skoraði Karin Egholm samanlagt 23 mál í teimum fimm dystunum í EHF Championship. Karin er eitt ár yngri enn tær flestu á liðnum og fær helst ein størri leiklut á H71-liðnum næsta kappingarár.

Hon er yngra systur Elsu Egholm, sum er A-landsliðsspælari og hevur vunnið nógv steyp við barndómsfelagnum síðstu árini, og eldra systur Jákup Egholm. Hann var føroyskur toppskjútti og valdur til besta vinstra vong í European Open fyrr í mánaðinum - Jákup skal eisini til HM-endaspælið við U19-liðnum í næsta mánaða.

Karin Egholm í FM-hálvfinalu fyri H71 (Mynd: Sverri Egholm)


Bjørk í gjøgnumbroti móti H71 (Mynd: Jens Kr. Vang)

Bjørk Franksdóttir Joensen er 18 ár og hevur longu lyklaleiklut fyri Neistan. Hon spældi so at siga allar minuttirnar í kappingini í Litava. Sambært Handballstatz skoraði Bjørk 21 mál og legði upp til 12 mál og var høgri bakkurin harvið ein lykil til føroyska finaluplássið. Hon hevur millum annað sína styrki í gjøgnumbrotsspælinum.

Seinastu árini hevur tað inn ímillum verið borið fram, at Føroyar hevur heldur fáar lámar spælarar - serliga bakspælarar. Hondbóltssamband Føroya hevur eisini sett inn á hesum økinum. Tí er tað gott at síggja, at tvær sum kasta við vinstru hond vísa seg væl fram í altjóða kapping. 


Spania hevði fýra umboð á liðnum - toppskjútti og tann besta í kappingini var frá vertstjóðini. Karin og Bjørk síggjast ávíkavist sum nummar trý og fýra frá høgru (Mynd: EHF)

All star-liðið:
Málverji: Marián Mera Amoedo (Spania):
Vinstri vongur: Tinkara Kogovšek (Slovenia)
Vinstri bakkur: Gabija Pilikauskaite (Litava)
Spælskipari: Blanca Benítez Narváez (Spania)
Strikuspælari: Lyndie Tchaptchet Defo (Spania)
Høgri bakkur: Bjørk Franksdottir Joensen (Føroyar)
Høgri vongur: Karin Egholm (Føroyar)

Verjuspælari: Carmen Arroyo Pimienta (Spania)
Toppskjútti: Gabija Pilikauskaite (Litava) – 44 goals
MVP (Mest virðismikla): Gabija Pilikauskaite (LTU)