Dysturin í Herning verður leiktur uttan áskoðarar

Fyrrapartin var tíðindafundur í Statsministerinum, har Mette Frederiksen og onnur greiddu frá nýggju tilmælunum í Danmark viðvíkjandi coronavirusinum. Aðalmálið er, at steðga spjaðingini av virusinum so nógv sum gjørligt, og tískil mæla myndugleikarnir til, at øll tiltøk har fleiri enn 1000 fólk savnast verða útsett, avlýst ella umskipað.

Hetta gongur millum annað útyvir fótbóltin. FCK kunngjørdi beinanvegin, at fýra teir næstu dystirnir hjá felagnum verða leiktir uttan áskoðarar. Hetta er eisini gjørt í italiensku Serie A og í Sveis.

Føroyar og Danmark spæla venjingardyst á MCH Arena 27. mars. Hetta er ein dystur, ið nógv hava sæð fram til í Føroyum, og nógvir føroyingar hava keypt atgongumerki, men nú er greitt, at hann ikki kann leikast við áskoðarum. Hetta er orsaka av nýggjastu tilmælunum.  

Tað er eisini ein møguleiki fyri, at dysturin verður avlýstur. DBU skrivar á heimasíðu sínari, at fótbóltssambondini skulu tosa um dysturin skal spælast ella ikki. Avgerð um hetta verður tikin komandi vikurnar og í samráð við danskar heilsumyndugleikar, skrivar danska fótbóltssambandið.  

6.000 fólk hava keypt atgongumerki til dystin. Tey ið hava keypt atgongumerki faá peningin aftur.