Eingin samanlegging í Hoyvík á hesum sinni

Í júst farna kappingarári vann Undrið FF 2. deild trygt og tryggjaði sær harvið fyri fyrstu ferð rættin at spæla í næstbestu mansdeildini. 

Nakað av iva var sáddur um, hvørs serstaka felagið frá 2006 fór at fáa loyvi at spæla í 1. deild, tí undir lóggávuni hjá FSF er neyðugt at hava millum annað ungdómslið. Tað hevur Undrið ikki, og hesin knúturin var sum skilst ein av orsøkunum til, at samanlegging var á borðinum.

7.november skrivaði bolt.fo um møguligu samanlaeggingina í Hoyvík, og stutt um hvussu bæði kundu fingið fyrimun av tí. Nevnt varð, at bæði feløgini skuldu hava aðalfund tíggju dagar seinni - í gjár - og at tann hjá Undrinum byrjaði ein tíma frammanundan. 


Undrið er sett saman av leikarum, sum eru "í góðum fótbóltsárum", koma ymsastaðni frá og har teir flestu helst ikki høvdu spælt fótbólt nú, um teir ikki spældu í Undrinum. Felagið er stórt sæð bygt uppá samanhald (Mynd: Sverri Egholm)

Júst hetta seinasta gjørdi, at eykaaðalfundurin hjá FC Hoyvík, har samanlegging við Undrið FF og navnabroyting var á skrá, varð avlýstur í síðstu løtu, tí uppskotsstillararnir fingu fráboðan um, at á aðalfundi hjá Undrinum, ið eisini hevði samanlegging á skrá, var ikki meiriluti millum limirnar um málið.

Hetta kundi FC Hoyvík staðfesta á Facebook-síðu sínari í gjárkvøldið. 

- Við støði í hesi avgerð, tóku uppskot stillararnir til eyka aðalfundin hjá FC Hoyvík, ið var nevndin, øll 3 uppskotini aftur, og tí var eyka aðalfundurin avlýstur.

Á facebook-síðuni hjá Undrinum vóru boðini kunngjørd á eitt sindur øðrvísi hátt. Sum skilst var tað ein ógvuliga breið semja í breiddarfelagnumum, at man vildi halda fram.

Harvið verða tað framvegis at vera tvey feløg, sum koma at hava heimavøll í Hoyvík í 2022; eitt sum hevur ungdómsdeild, har nakrir leikarar eru at síggja á ungdómslandsliðunum og har besta mansliðið framhaldandi fer at spæla í 2. deild - hitt uttan ungdómsdeild men við sínum einasta liðið í næstbesu mansdeildini. 

Sí eisini: - Vóna at vit kunnu verða næsta felagið ið brýtur igjøgnum í Føroyum