Fótbóltur

Eykaliðið hjá Liverpool skal aftur spæla steypadyst

Jurgen Klopp hevur ongan áhuga at spæla umdystin í 4. umfari í FA Cup móti Shrewsbury orsakað av vetrarferiu og framferðarháttinum hjá fótbóltssambandinum. Nógv skal koma uppá pláss áðrenn 5 umfar.

Klopp er ónøgdur við, at umdysturin er lagdur í næstu viku, uttan samráð við nakran. Liverpool eigur, eins og hini liðini í Premier League, at hava frí í næstu viku (Mynd: EPA)

Klopp er ónøgdur við, at umdysturin er lagdur í næstu viku, uttan samráð við nakran. Liverpool eigur, eins og hini liðini í Premier League, at hava frí í næstu viku (Mynd: EPA)

2020-01-28 19:55 Author image
Agnar Prestá
placeholder

4. umfar í FA Cup varð leikt í vikuskiftinum, og tað var als ikki óáhugavert. Serliga ikki í Shrewsbury, har ein av teimum seks javnleikunum var. Oddaliðið Liverpool var á odda 2-0 móti triðjideildarliðnum, men Jason Cummings skoraði tvær ferðir, og harvið er umdystur neyðugur.

Les eisini: Shrewsbury vendi 0-2 til 2-2 móti oddaliðnum í Premier League

Tann dystin fara Jürgen Klopp og hansara menn ikki at møta upp til. Eins og í desember skal U23 liðið (eykaliðið) royna at spæla Liverpool víðari í einum steypadyst. Tá tapti Liverpool 5-0 fyri Aston Villa, og tá vóru Mané, Salah, Van Dijk og hinir í Katar og vunnu HM fyri lið. Nú vera fyrstaliðsleikararnir í vetrarferiu. Premier League hevur lagt eina feriu inn, har liðini hava áleið tvær vikur uttan dyst. Hetta er fyri, at leikararnir fáa ein stegð eftir hørðu dystarskránna seinastu smáu tveir mánaðirnar. 

Klopp rósti í samrøðu eftir dystin, at tað var eitt flott comeback av Shrewsbury, men at hann ikki fór at møta upp til umdystin, og tað fara eingir av leikarunum, ið vanliga spæla heldur ikki. Týski venjarin hevur í dag váttað og útgreinað, at hann fer at gera hetta og hví. Klopp vísti millum annað á, at FA, ið ikki er samanbundið við Premier League, hevur tikið eina óskiljandi avgerð uttan samráð við nøkur fótbóltsfólk við at leggja dystin í fyrstu vikuni í februar - eitt tíðspunkt ið var tilætlað til vetrrferiu.

Ymiskt er, hvat fólk í fótbóltsheiminum halda um hetta. Summi meta, at Klopp hevur í prinsippinum rætt, tí at tann tiltrongda frítíðin uttan dyst var ætlað til júst tað. Klopp hevur leingi víst á, at dystarskraín er ov tøtt hjá ensku liðunum. Onnur vísa tó á, at hetta meira er grenj, og at tað er ikki at hava virðing fyri kappingina og fyri Shrewsbury. Formaðurin hjá felagnum úr League 1 er sera ónøgdur og firtin - venjarin hevur tó sagt, at hann skilir væl støðuna. Umdysturin er settur til um eina viku, týsdagin 4. februar á Anfield.

Seks umdystir skulu spælast áðrenn fyrstu vikuna í mars. Dato er ikki ásett enn á allar.


FA Cup, 5. umfar (verður leikt 3-5 mars):

Portsmouth - Arsenal

Sheffield Wednesday - Manchester City

Umdystir: 

Chelsea - Shrewsbury Town / Liverpool

Leicester City - Coventry City / Birmingham City

Northampton Town / Derby County v Manchester United

Southampton - Tottenham Hotspur / Norwich City

West Bromwich Albion - Newcastle United / Oxford United

Reading / Cardiff City - Sheffield United

 

placeholder
placeholder