Fingu fýra onnur lið - byrja í mars

Stutt fyri middag gjørdist tað greitt, at føroyska A-landsliðið við monnum fær hendan bólkin til HM-undankappingina næsta ár: 

Frakland/Kroatia (taparin av teimum í Nations League-uppgerð í mars)
Kekkia
Montenegro
Føroyar
Gibraltar

Rachel Yankey dró Føroyar úr pottinum næstseinast av liðunum í næstovasta styrkislagnum (Skíggjamynd)

Talan er um eitt miðal lutakast - og møguliga yvir miðal tá hugsað verður um fyritreytirnar. Tað var frammanundan møguleiki fyri at ikki fáa eitt lið úr niðasta styrkisbólkinum við. Í so hall høvdu Føroyar endað í bólki við bert fýra liðum og sum tað lægst styrkismetta.

Gibraltar hava vit ongantíð spælt kappingardyst móti fyri. Móti teimum eiga Føroyar at hava ógvuliga góðan møguleika at fáa nógv stig ímóti.

Montenegro hava Føroyar ongantíð spælt ímóti, og liggja tað helst rímiligir møguleikar móti teimum - serliga á Tórsvølli. Hetta var ikki ein av sterkaru liðunum úr triðja styrkibólkinum.

Kekkia var avgjørt ikki ynskimóstøða úr næstovasta styrkisbólki. Teimum hava Føroyar spælt tríggjar ferðir ímóti seinastu 25 mánaðirnar, og tað er samanlagt endað 9-0 til Kekkia.

Seinasta mótstøðuliðið kemur ikki endaliga uppá pláss fyrrenn 23. mars, tá Frakland og Kroatia hava spælt seinnu Nations League-fjórðingsfinaluna landanna millum. Har er Frakland favorittur og kemur taparin av hesari uppgerðini í undanbólkin hjá Føroyum. Tað verða franskar heimsstjørnur sum Mbappé ella eitt kroatiskt lið, sum helst er meira at tosa við - og sum í so fall verður heilt nýtt mótstøðulið fyri føroyska manslandsliðið.

Fyrstu dystirnir í bólkinum verða spældir millum 20. og 24. mars. Harvið eru beint yvir tríggir mánaðir til næsta kappingardystin hjá Føroyum - endaliga skráin er ikki løgd enn. Føroyar hava ongan landsliðsvenjara í løtuni.

Bólkurin (Mynd: FSF)