Finnland spældi seg til EM í kvøld

Fótbóltssøga varð skrivað á Telia 5G Arena í Helsingfors í kvøld, tá finska A-landsliðið, sum væntað, vann 3-0 á Liktinstein.

Sigurin merkir at finska landsliðið hevur spælt seg til endaspælið um Evropameistaraheitið, sum verður komandi summar.

Jasse Tuominen, sum dagliga spælir við hvítarussiska liðnum Bate Borisov, legði Finnland á odda í fyra hálvleiki. Í øðrum hálvleiki staðfesti toppskorarin á liðnum, Teemu Pukki úr Norwich, søguliga sigurin við tveimum málum, harav annað upp á brotsspark.

Hóast eitt umfar er eftir at spæla, so er tað nú greitt, at tað verða Italia og Finnland, sum spæla seg til EM-kappingina úr bólki J.

Les eisini: Søguligur dagur í finskari fótbóltssøgu

Sostatt gjørdist Finnland eisini fyrsta norðurlandið, sum kom til EM-kappingina.

Svøríki kann gerast tað næsta norðurlandið, ið kvalifiserar seg. Svøríki, úr sama bólki sum Føroyar, spælir á útivølli móti Rumenia í kvøld, og um sviar vinna, eru teir víðari saman við Spania, sum spælir heima móti Malta í kvøld.

Danmark hevur eisini ein lættan dyst í kvøld, á heimavølli móti Gibraltar. Men ein sigur er neyvan nóg mikið at tryggja sær EM-luttøku. Danmark skal spæla móti Írlandi á útivølli í seinasta umfari.

Jasse Tuominen skoraði til 1-0 (Mynd: EPA)

Teemu Pukki skoraði tvær ferðir í øðrum hálvleiki (Mynd: EPA)