Føroyar á 3. plássi í bólkinum

Við úrslitunum í bólki L í gjár, liggja Føroyar á 3. plássi í HM-undankappingardystinum. 

Undankappingin til HM 2026 - Bólkur L
Í gjár, mánadagin 8. september
Gibraltar - Føroyar 0-1 (0-0)
68' Martin Agnarsson 0-1

Kroatia - Montenegro 4-0 (1-0)

Les eisini: Seinasti hálvi tímin á Gibraltar bjargaði trimum stigum

Kroatia og Kekkia kappast um 1. plássið, sum gevur beinleiðis atgongd til HM-endaspælið í 2026. Hesi bæði liðini hava tólv stig - Kroatia hevur spælt ein dyst færri og er bæði betri í mun til málúrttøku og innanhýsis.

Føroyar og Montenegro hava seks stig hvør. Bæði hava spælt fimm dystir. Síðani sigurin á júst Føroyum í 2. umfari 25. mars (1-0 við máli í yvirtíðini) hevur Montenegro ikki skorað: Úrttøkan hevur verið tvey 2-0 tap fyri Kekkia og í gjár eitt 4-0 tap í Kroatia.

Føroyar vóru ein minutt frá at vinna sær eitt stig í Montenegro í 2. umfari í undankappingini. Hesin dysturin varð spældur í mars (Myndir: Sverri Egholm)

Harvið fara Føroyar við hægri sjálvsáliti úr landsliðssteðginum. Liðið hevur eisini latið væl færri mál inn enn Montenegro og hevur verið við í dystunum móti  Kroatia og Kekkia til seinasta bríksl.

Tað skal tó sigast, at føroyingar hava spælt móti Gibraltar - veikasta liðnum í bólkinum - tvær ferðir. Montenegro hevur bert spælt móti Gibraltar einaferð, og í Kroatia í gjár fekk Montenegro reytt kort stutt fyri steðgin (tá støðan var 1-0).

Dysturin á Tórsvølli um júst ein mánaða, hósdagin 9. oktober, verður lykladysturin í stríðnum um 3. plássið. Eitt pláss, sum ikki gevur nakað í sær sjálvum, men sum bæði sjálvandi fara eftir. Eyðun Klakstein staðfesti eisini eftir sigurin í gjár, at Føroyar nú fara eftir at taka stigametið fyri eina HM/EM-undankapping. Hetta er níggju.

Sí eisini: Gunnar Vatnhamar: - Tað er í okkara dna'i at stríðast til tað seinasta

Atgongumerki til Føroyar - Montenegro kunnu keypast her - tríggjar dagar seinni, 12. oktober, taka Føroyar ímóti Kekkia

Sí eisini: Myndir: Gibraltar - Føroyar