Føroyar møguliga vertir til HM 2027

Ymiskir miðlar vóru í gjár tíðindini um, at Norðurlond ynskja at gerast vertir fyri HM-endaspælinum í kvinnufótbólti í 2027. M.a hevði BBC søguna, og hevði Tórsvølli sum høvuðsmynd til greinina. Í greinuni stendur millum annað, at tey seks fótbóltssambondini í Norðurlondum hittust í hesum mánaðinum, og formaðurin í norska fótbóltssambandinum,  Terje Svendsen, sigur við bretsku heimasíðuna, at londini hava gott samstarv. 

Les greinina her

Fótbóltssamabndið skrivar víðar, at í meira enn eitt ár hava tey norðurlendsku fótbóltssambondini kanna møguleikan, og nú byrja ítøkiligu fyrireikingarnar til verkætlanina, sum verður kallað Visjón 2027. Nú skal greiða fáast á, hvørjir av norðurlendsku leikvallunum lúka treytirnar hjá FIFA til HM fyri kvinnur. Møguleikin fyri at Føroyar gerast partur av hesum er góður, tí umframt sjálvar dystirnar er ein hópur av øðrum tiltøkum knýtt at eini slíkari HM kapping, og tí er sannlíkt, at øll seks Norðurlond verða virkin partur av verkætlanini. FiFA er opið fyri, at fleiri lond hýsa endaspælinum.

Formaðurin í Fótbóltssamandi Føroyar sigur soleiðis um verkætlanina: 

- At hýsa eina av stóru endakappingunum hevur leingi verið eitt ynski millum norðurlendsku fótbólssambondini. Vit ynskja at geva áskoðarunum møguleikan at síggja heimsins bestu lið á vøllinum í teirra nærumhvørvi. Kvinnufótbóltur hevur havt fremstu raðfesting hjá okkum seinastu árini, og tí er eisini nattúrligt, at tað verður HM kappingin fyri kvinnur, roynt verður eftir, sigur Christian Andreasen, forseti í Fótbóltssambandi Føroya.

Málsetningurin at fáa eina stóra altjóða kapping til Norðurlond bleiv staðfestur á fundi millum fótbóltssambondini í seinastu viku. Arbeiðsbólkurin, sum er settur til verkætlanina, fer nú víðari at arbeiða fyri, at londini kunnu gerast vertir fyri HM kappingini hjá kvinnum í 2027. Talan er um eina undanverkætlan, har møguleikarnir at hýsa HM fyri kvinnur í 2020 verða kannaðir. 

HM verður í Fraklandi í summar. í 2023 verður tað uttanfyri Evropa.