![placeholder](https://roysni.fo/css/img/banner2x1.png)
Gunnar Vatnhamar fær vitjan av fleiri gomlum kenningum í Reykjavík í kvøld. Ikki tí hann kennir nakran hjá albanska KF Egnatia, sum Víkingur Reykjavík skal royna at sláa út, men tí at ein føroysk dómarakvartett er á staðnum.
Tað eru Jóhan Hendrik Ellefsen, Dan Højgaard, Jørleif Djurhuus og Dagfinn Olsen, sum skulu leiða Conference League-dystin.
Fyrstnevndi fara at renna inni á vøllinum. 36-ára gamli miðvingurin gjørdist FIFA-dómari tíðliga í 2023 og hevði nakrar altjóða uppgávur í fjør.
Dan og Jørleif fara at hava flagg í hond í "Víkini", og hava rituvíkingurin og maðurin av Morskranesi heilt fitt av royndum í slíkum dystum.
Tann mest royndasti av hesum er Dagfinn Forná, sum skal hava skil á bonkunum báðum og samstundis hjálpa eitt sindur við dømingini. Hann er, eins og Dan Højgaard, úr Rituvík.Dan Højgaard, annar av hjálpardómarunum í Íslandi í kvøld (Mynd: Hans Erik Danielsen/FSF)
Í síðstu viku var Heini Ziskason Viðoy í evropeiska eldinum - í kvøld er tað Jóhan Hendrik Ellefsen (Savnsmynd: Sverri Egholm)
Gunnar Vatnhamar og Víkingur Reykjavík taptu fyri írsku meistarunum Shamrock Rovers í 1. umfari í Champions League. Harvið stendur íslendski greipuvinnarin nú í 2. umfari í Conference League og skal vinna samanlagt á KF Egnatia fyri at halda lív í evropeiska summarinum.
Víkingur er favorittur í kvøld og skal royna at fáa gott útgangsstøði. Føroysku dómararnir skulu royna at koma væl frá uppgávuni í Íslandi.
Dysturin byrjar klokkan 19.45 føroyska tíð.
Vinarliga broyt tínar kennifíla - og privatlívsstillingar fyri at síggja hetta innihald