Agnar Prestá
Hósdagin spælir liðið hjá Håkani Ericson fjórða dystin í hesari EM-undankappingini. Føroyar hava higartil fingið eitt stig - tað var á útivølli móti Moldova.
Eftir tveir heimadystir er nú aftur útidystur á skránni, og fyri fyrstu ferð nakrantíð skulu Føroyar spæla kappingardyst móti Póllandi. Hetta verður tó ikki fyrstu ferð, at londini hittast á A-landsliðsstigi hjá monnum ella í Póllandi.
Sum yvirlitið á heimasíðuni hjá FSF vísir á, so hevur talan verið um tríggjar dystir, tríggjar sigrar til Pólland og samanlagt 1-12 í málúrttøku. Seinast londini spældu venjingardyst var í pólska býnum Wronki í mai 2006. Har endaði Jens Martin Knudsen sína tíð á landsliðnum. Tá 38-ára gamli málverjin spældi fyrra hálvleik og núverrandi málmansvenjarin á A-landsliðnum, Jákup Mikkelsen, spældi hin.
Sí dómaraseðil hjá FaroeSoccer her
Hinir báðir venjingardystirnir millum Føroyar og Pólland eru spældir á venjingarlegnum í ávíkavist Spania og Kýpros. Í 2004 gekk heilt galið, tá eitt lið við spælarum úr so at siga bert pólsku deildini vann 6-0. Tvey ár frammanundan var talan um javnari dyst. Tá skoraði John Petersen í 2-1 tapi.
Pólland hevur higartil vunnið á Albania á heimavølli men tapt útidystirnar móti Kekkia og Moldova og er harvið kroyst í bólkinum. Málið hjá Fernando Santos og hansara monnum er sjálvsagt EM-endaspælið. Í fjør kom Pólland í áttandapartsfinalurnar í HM-endaspælinum í Katar, har Frakland gjørdist endastøðin. Stóra stjørnan hjá Póllandi er 35-ára gamli metmaðurin, áleyparin úr Barcelona, Robert Lewandowski.
Føroyar og Pólland spæla á PGE Narodowy leikvøllinum hósdagin 7. september klokkan 19.45. Portalurin verður við á ferðini úr Kastrup seinn i í dag - hópurin hevur síðani tíðliga í gjár fyrireika seg í Malmö.
Sí eisini: A-landsliðið er byrjað at fyrireika seg
Vinarliga broyt tínar kennifíla - og privatlívsstillingar fyri at síggja hetta innihald