Haaland er nú deildur toppskjútti í Champions League

Navnið Erling Braut Håland er framvegis glóðheit í evropeiskum fótbólti. Í gjárkvøldið skoraði norðmaðurin til 1-0 og 2-1 í sigrinum á PSG í fyrru áttandapartsfinaluni í Champions League

Avgerandi málið var frálíkt, og við tí kom Håland undir liðuna á Robert Lewandowski á toppskjúttalistanum í størstu kappingini fyri lið í heiminum. Stóri, sterki og dungaligi ungi maðurin skoraði átta ferðir í bólkaspælinum fyri Salzburg í heyst, og tað er bert í einum dysti í kappingini, at 19-ára gamli áleyparin ikki er komin á máltalvuna.

Síðani Erling Håland skifti til Borussia Dortmund millum jól og nýggjár, hevur hann skorað 11 ferðir í sjey dystum. Håland hevur spælt 440 minuttir fyri týska liðið, og skorar harvið hvønn 40. minutt; í miðal íhvussu er eitt mál fyri hvønn hálvleik, sum hann spælir.