Fótbóltur

HB fór avstað við øllum í Sarpugerði

Aron Benjaminsen legði upp í seinasta dystinum fyri Víking, men so tók HB av álvara yvir í vindinum og skoraði trý mál. Ósigrað í landskappingini undir Lukaszi Cieslewicz og liggur væl fyri til minst evropeiskt pláss - Víkingur meira kroyst eftir fyrsta heimatapið í ár..

Mathoas Voss var ein av eyðsýndu spælarunum í Sarpugerði, har HB skjótt vendi tingunum og vann 3-1 (Savnsmynd: Sverri Egholm)

2026-08-28 21:16

Agnar Prestá

Fyri tveimum mánaðum síðani tapti HB 4-0 í Norðragøtu í seinnu hálvfinaluni í kappingini um Løgmanssteypið, og harvið skal Víkingur spæla steypafinalu næsta vikuskifti. Men hetta er eisini einasta tapið hjá HB móti føroyskum liði í níggju slíkum dystum, síðani Lukasz Cieslewicz tók við sum høvuðsvenjari miðskeiðis í juni.

Søgur ganga um, hvør skal vera høvuðsvenjari hjá HB næsta ár - alt meðan "pólski føroyingurin" byggir eina sak fyri, at hann møguliga kann verða fasti maðurin. HB er formsterkasta liðið í Meistaradeildini í løtuni og gjørdi í kvøld nakað, sum eingin annar hevur gjørt í 2026: Vann sum útilið í Sarpugerði.

Tað var málleyst í steðginum, men ikki tí: Inntensiteturin var av álvara har, og møguleikar vóru báðar vegir. Víkingur hevði fleiri støður í viðvindinum.

Heimaliið legði seg á odda í 57. minutti. Aron Benjaminsen legði væl innfyri, tá Víkingur fekk fríspark í vinstru, og fekk enn eitt málstig at fara til Skotlands við. Tað var Jørgen Nielsen, sum stýrdi bóltinum í netið.

Hoyr eisini: Aron Benjaminsen: Eg fari til Skotlands mánadagin

Men so tók HB veruliga yvir. Sjey minuttir eftir 1-0 málið spældi HB, sum nú hevði vindin undan, væl í høgru. Eyðsýndi Mathias Voss innum til Dan í Soylu, Bárður á Reynatrøð bjargaði, men bólturin stakk til Heina Fossadalsá Sørensen, sum javnaði.

Teir í reyðum og svørtum spældu við sjálvsáliti, og í 73. Minutti varð 1-2. Talan var um horna úr vinstru. Dan í Soylu nýtti vindin nakað, og Bárður á Reynatrøð tapti nærdystin við Ára Mohr Jónsson á mállinjuni. Víkinga-málverjin vildi hava brotsspark, har var onkur kontakt, men Eiler Rasmussen metti ikki har var brot framt.

Júst tá varð Aron Benjaminsen skiftur út, og Víkingur kom ikki við nøkrum serligum álopskendum restina av dystinum; spælið hekk ikki væl saman. Heldur var nærri 3-1, og í yvirtíðini revsaði HB: Long sending til skjóta Voss, sum fann innskifta Moses Ebiye: Trý mál og trý stig.

Eftir vónbrotið móti 07 Vestur sunnudagin reistist HB skjótt. Liðið hevur vunnið sjey av átta landskappingardystum síðani venjaraskifti og nú móti øllum hinum liðunum í topp-fimm. HB er við sigrinum fýra stig frá Víkingi, sum er nummar fimm og liggur harvið væl til Evropa - tað eru heldur ikki meira enn fýra stig til 1. plássið í løtuni.

Tyngri sær út hjá Víkingi, sum bert hevur fingið eitt stig seinastu tríggjar dystirnar. Fyrr í august, var liðið annars sum so við í meistarastíðnum, men í løtuni er liðið úr Eysturkommunu uttanfyri evropeisku plássini. Víkingur tryggjar eitt slíkt, um tað eydnast at vinna steypafinaluna móti KÍ leygardagin 5. september. Annars skal liðið hjá Jóhan Petur Poulsen upp á 4. plássið.

21. umfar í Meistaradeildini - umframt "uppflytingardystur í 1. deild"
Fríggjadagin 28. august
Vikingur - HB 1-3 (0-0)
57' Jørgen Nielsen 1-0
64' Heini Fossdalsá Sørensen 1-1
73' Ári Mohr Jónsson/Dan í Soylu 1-2
90 (+3)' Ebiye Moses 1-3

Hoyr eisini: Ósa og Gregersen: Føroysku liðini kundi fingið betri fyritreytir í Evropa - nógvir spennandi spælarar vísa seg fram

Leygardagin 29. august
12.00: B71 - B36 II

Les eisini: Eftir 15-ára bíðitíð: B71 kann flyta upp leygardagin

Sunnudagin 30. august
15.00: B36 - B68
15.00: NSÍ - AB (FM1)

17.15: Skála - 07 Vestur (FM1)

Eftir dystirnar taka Trygvi Absalonsen og onnur samanum umfari í sendingini 3. Hálvleikur, sum byrjar klokkan 19.30

Mánadagin 31. august
18.30: KÍ - EB/Streymur (FM1)

Lurta eftir FM1 her

Stigatalvan:

Vinarliga broyt tínar kennifíla - og privatlívsstillingar fyri at síggja hetta innihald