HB steypavinnari eftir brotssparkskapping

Tað var ikki langt frá, at B68 fekk ein søguligan steypasigur og harvið evropeiskt pláss á Tórsvølli í kvøld. Ístaðin endar Løgmanssteypið aftur í HB-húsinum og síðsta evropeiska pláss í grannahúsinum.

HB skapti sum nóg mikið at vinna finaluna, men B68 stríddi seg ógvuliga væl inn í dystin og var í roynd og veru nærri við í longdu leiktíðini. Eitt flott liðavrik av liðnum hjá Jákupi á Borg, har kanska serliga miðverjan við ungu lokalu Áka Johannesen og Aroni Reinert Hansen í miðverjini stóð sterk í miðjuni.

Les eitt sindur meira um vanligu leiktíðina her.

Áskoðarnir - á báðum síðum - gjørdu eisini sítt, og bitu helst neglirnar heilt niður, tí tíggju brotsspørk skuldu til fyri at avgera steypafinaluna.

Reyði Pantarin var fantastiskur...


...og teir í reyðum stríddist væl á vøllinum. Tað var tó ikki mikið (Myndir: Sverri Egholm)

HB-spælararnir gjørdu sítt úr ellivu metrum. Í roynd og veru vóru allir fimm skjúttarnir púra tryggir, hóast Benjamin Schubert, ið hevði nakrar stórbjargingar í dystinum, royndi sítt. Teitur Matras Gestsson er tiltikin góður úr ellivu metru, og HB-liðskiparin las Sebastian Lau Nielsen, ið skeyt fyrsta brotssparkið hjá B68.

B68 hevur brent nøkur brotsspørk í ár, og í kvøld kostaði eitt slíkt. Harvið endar eitt tungt ár hjá felagnum við tapi á størsta pallinum - Jákup á Borg, hansara menn, Reyði Pantarin og øll í Nes Kommunu kunnu tó vera errin av hesari finaluni. 

Hanus Sørensen átti avgerandi skotið, og eftir tað reyk blusan, og HB'arnir kundu stórfegnast. Finalusigur nummar 29 hjá felagnum, tann triði og seinastu fimm árini og liðið hjá Jákupi Martin Joenen endaði árið væl.


Hanus Sørensen hevur skorað seinasta málið - 22-ára gamli hoyvíkingurin var ógvuliga tryggur (Mynd: Sverri Egholm)

Finalan um Løgmanssteypið 
Í dag, leygardagin 3. november
B68 - HB 3-5  eftir brotssaparkskapping - 0-0 eftir vanliga leiktíð og longda leiktíð

Brotssparkskapping:
Adrian Rúnason Justinussen 0-1
Sebastian Lau Nielsen brennir (Teitur Matras Gestsson bjargar)
Viljormur Davidsen 0-2
Jørgen Nielsen 1-2
Ári Mohr Jónsson 1-3
Hjalti Strømsten 2-3
Heri Hjalt Mohr 2-4
Alex Mellemgaard 3-4
Hanus Sørensen 3-5


Fleiri myndir og samrøður seinni.