Regin Winther Poulsen
H71 vann triðja og seinastu hálvfinaluna ímóti VÍF. Tí hava hoyvíkingar nú tryggja sær fyrsta finaluplássið í kappingini hjá monnum.
Tað leikaði hart á frá fyrsta bríkslið í finaluni. VÍF legði betri út og førdi fyrsta korterið av dystinum. Álopsspælið hjá vestmenningum riggaði heilt væl, og tað var ofta torført hjá H71-verjuni at steðga Filip Jojic.
Men eftir 16 minuttir tók H71 leiðsluna frá Vestmenningum og hana hildu teir restina av dystinum. Hálvleiksstøðan var 14-11 til H71.
Sí eisini: Myndir: H71-VÍF
Hoyvíkingar byrjaðu seinna hálvleik sum teir endaðu fyrra. Sum frá leið gjørdist greitt, at hoyvíkingar vóru omaná í dag. So at siga alt riggaði í álopinum, samstundis sum verjan og málmenn stóðu væl.
Miðskeiðis í seinna hálvleiki kom Hørður Trygvason inn í H71 málið, og hann nærmast stongdi H71 málið. Tá hann ímóti endanum av dystinum bjargaði straffi frá Filip Jojic, var dysturin avgjørdur. Einu løtuna førdi H71 við 9 málum.
Dysturin endaði 28-21 til H71.
Vilhelm Poulsen og Peter Krogh skoraðu báðir 6 mál fyri H71. Filip Jojic skoraði 8 mál fyri VÍF.
Vinarliga broyt tínar kennifíla - og privatlívsstillingar fyri at síggja hetta innihald