Í kvøld skal stig á kontuna

Aserbadjan fór við øllum úr Klaksvík fríggjadagin, tá Føroyar tóku ímóti í 3. umfari í nýggju Nations League-kappingini. Føroysku kvinnurnar fingu sítt fyrsta mál í bólkinum - tá Sunniva Willemoes stútaði bóltin væl í málið eftir hornaspark frá Tórunn Højgaard Joensen. Tað endaði tí við teprum tapi, eins og tað gjørdi í 1. umfari og 2. umfari.

Føroyska liðið er í gongd við at venja seg við at hava bóltin meira í dystum, og fríggjadagin eydnaðist at skapa eitt sindur meira enn í teimum báðum fyrstu dystunum, sum endaðu 0-1. 

- Vit hava verið nær við at vinna stig í hinum dystunum, og serliga fríggjadagin helt eg at vit høvdu uppiborðið meira. Vit hava lagt nógv arbeiði í at blíva betri á síðsta triðinginum, og so trúgva vit uppá, at tað arbeiði fer at løna seg í morgin. Vit taptu 1-0 niðri á Kýpros, so vit vita at tað saktans kann koppa okkara veg, men at tað krevur grót hart arbeiði.

Soleiðis sigur Signe Pries Andersen, landsliðsvenjari, við heimasíðuna hjá FSF nú undan dystinum móti Kýpros.

Sí eisini: Fara eftir sigrinum

Føroyar taptu 1-0 á Kýpros 26. september. Kýpros hevur fýra stig. Hetta er seinasti heimadystur hjá Føroyum í kappingini, og nú skal tað skerpast, og stig skulu á kontuna - eisini fyri sjálvskensluna. Sambært veddingarfyritøkum eru Føroyar ein heilt lítil favorittur. Tað kann gera mun, at liðskiparin Ásla Johannesen er tøk aftur eftir leikbann.

Fyrsta bríksl á Tórsvølli verður klokkan 18. Atgongumerki kunnu fáast her. Dysturin sæst í Rás1 hjá Televarpinum.