Innsent
Í gjárkvøldið møttust Fleyr og ÍF fyri fjórðu fer hetta kappingarárið, og fyri fjórðu ferð var neyðugt við fimm settum fyri at avgera dystin. Teir fyrru tveir dystirnar hevði Fleyr vunnið 3-2, men teir seinnu tveir hevur ÍF vunnið 3-2.
Fleyr, við 49 ára gamla Jens Hera Bolstad Mortensen sum libero, kom annars í góða støðu at vinna dystin í gjár, tá støðan gjørdist 6-1 í javnbrótaranum eftir góðan blokk frá Jóhan Arna Elisson Wang, men eftir drúgvan bardaga um næsta stigið langaði Hákun Nón til endans bóltin í gólvið hjá Fleyr, so støðan gjørdist 6-2 heldur enn 7-1, og stutta løtu seinni hevði ÍF fingið samband við Fleyr aftur, tá støðan gjørdist 6-7 (til Fleyr) eftir fýra stig á rað.
Fleyr helt seg kortini frammanfyri við einum og tveimum stigum og fekk eisini tveir dystarbóltar við støðuna 14-12, men tann fyrri fór fyri skeytið, tá satsaða servan brast í netið og tann seinni, tá Teitur Eliasen vann í blokkinum. Í staðin fekk ÍF dystarbólt, tá Fleyr lorkaði bóltin í netið, og dystarbóltin vann ÍF, tá smassjið frá Fleyr tók í antennuna, so at ÍF vann 16-14.
Við teimum tveimum stigunum fer ÍF tvey stig framum Fleyr, og tí er bronsan á veg til fuglafjarðar, um ikki Fleyr vinnur á Mjølni í næstsíðsta dystinum hjá sær, sum er mánadagin um eina viku.
Støðan í Polestar-deildini:
| Nr | Lið | Dystir (av 16) | Settmunur | Stig |
| 1 | SÍ | 13 | 25 | 33 |
| 2 | Mjølnir | 13 | 19 | 30 |
| 3 | ÍF | 13 | -2 | 19 |
| 4 | Fleyr | 14 | -4 | 17 |
| 5 | Ternan | 13 | -38 | 0 |
Vinarliga broyt tínar kennifíla - og privatlívsstillingar fyri at síggja hetta innihald