Ísak móti Vilhelmi í European League í kvøld

3. umfar í bólkaspælinum í European League er á skránni í kvøld, og har ímillum er ein føroyingauppgerð.

Hendan verður í Hannover, har Vilhelm Poulsen og Hannover Burgdorf taka ímóti Ísaki Vedelsbøl og IK Sävehof.

Liðini liggja ávikavist nummar 1 og 2 í bólkinum, har tvey lið koma víðari, so talan er um týðandi dyst.

Fyrsta bríksl verður klokkan 19.45 føroyska tíð, og føroyski høgri bakkurin og føroyski strikuspælarin - báðir fastir og týðandi á landsliðnum - kunnu síggjast á Viaplay.

Vilhelm Poulsen hevur havt fleiri fínar dystir fyri Føroyar í seinastuni (Mynd: Sverri Egholm)

Longu klokkan 16 spæla Jóhan á Plógv Hansen og Skanderborg AGF í Rumenia. Hetta er ímóti CS Minaur Baia Mare, sum Nuno Farelo er høvuðvenjari hjá. Portugisin hevur áður verið venjari hjá besta manslandsliðnum hjá VÍF.

Jóhan á Plógv Hansen spældi ein flottan dyst móti GOG um vikuskifti. Uppgerðin hjá danska og rumenska liðnum sæst á Viaplay og á TV3 Sport.

Liðini hjá Dánjali Ragnarsson, Tróndi Mikkelsen og Elias Ellefsen á Skipagøtu spæla eisini í kvøld. Sìðstnevndi verður helst spardur, meðan fyrrverandi Neista-spælararnir eru skaddir og spæla tí ikki í løtuni.