Jóan Símun og Bielefeld beina kós móti Bundesliguni

Hamburger SV og Stuttgart, ið eru tvey av miðalstóru liðunum í týskum fótbólti, taptu sínar dystir í 2. Bundesligaini í gjár. Harvið var møguleiki hjá Arminia Bielefeld fyri at økja um munin, og liðið hjá Jóan Símuni Edmundssyni tók av á heimavølli móti botnliðnum Wehen í dag. 

Tað gingu tó 73 minuttir, til tað eydnaðist oddaliðnum at koma á odda. Tað var tveir minuttir eftir, at Jóan Símun var útskiftur. Tað var toppskjútin hjá Bielefeld, Fabian Klos, ið stóð fyri málinum, ið gjørdist einsamalla málið í dystinum. 

Bielefeld hevur 50 stig fyri 24 dystir. Liðið er seks stig frammanfyri Stuttgart og heili níggju stig frammanfyri Hamburger SV, ið liggur á 3. plássi, ið gevur rættin til upp- og niðurflytingardystir móti triðniðasta liðnum í Bundesliguni.

Arminia Bielefeld spælir aftur næsta mánadag, 9. mars. Tá er talan um lykladyst - hann er á útivølli móti Stuttgart.