John Eystberg fingið stóra viðurkenning frá UEFA

Úr Føroyum varð John Eystberg skotin upp av FSF. 53-ára gamli vágbingurin í Havn hevur seinastu árini verið nógv virkin í HB.

HB og UEFA skriva, at hóast hann hevur annað fulltíðarstarv enn fótbólt, brúkar John umleið 25 tímar um vikuna til at venja og skipa fyri gentu- og kvinnufótbólti í HB, har hann venur U11 gentur, U16 gentur og 1. deild kvinnur.

John brúkar nærum alla sína frítíð til at betra um venjingarumstøðurnar og at skapa trivna fyri leikararnar. Umframt venjingar, so skipar hann eisini fyri, at genturnar fara til hvønn landsdyst hjá A-landsliðnum við kvinnum, har tær heppa á og fáa íblástur frá sínum fyrimyndum. Eisini skipar hann fyri, at eldru kvinnurnar í felagnum viðhvørt koma at venja ungu genturnar.

- Við at vísa engagement í eygnahædd, gleði um fótbóltsspælið, at fara væl fyrireikaður til hvørja venjing, skapar tú karmar, sum fær genturnar at trívast. Við trivnaði skapar tú eitt umhvørvi har børn læra og vilja læra at spæla fótbólt, sigur John við heimasíðuna hjá UEFA.

- Vit eru errin og fegin av at hava eina slíka eldsál sum John í felagnum, og ynskja honum hjartaliga til lukku við viðurkenningini, skrivar HB á Facobook-síðu sínari.