Hondbóltur

Kekkia hevur meldað avboð til HM

Norðurmakedónia avloysir helst liðið, sum skuldi spæla í Føroyum í farnu viku, og sum hevði ov nógvar staðfestar koronatilburðir undan fráferð til Egyptalands. Ivasamt er við USA, ið hevur 18 tilburðir.

Trupulleikarnir hjá Kekkia byrjaðu við, at Jan Filip og hjálparvenjarin Daniel Kubes fingu staðfest korona fyrst í árinum

Trupulleikarnir hjá Kekkia byrjaðu við, at Jan Filip og hjálparvenjarin Daniel Kubes fingu staðfest korona fyrst í árinum

2021-01-12 18:06 Author image
Agnar Prestá
placeholder

Mikudagin 6. januar skuldi Kekkia spæla EM-undankappignardyst í Høllini á Hálsi. Ferðalagið kom til Føroya dagin fyri, men dysturin varð av ongum. Orsøkin var nógvir koronatilburðir í kekkiska ferðalagnum, sum vórðu staðfestir við kanning í Vágunum.

Les eisini: 
Føroyar - Kekkia: Nýggj dagfesting skal finnast
Fleiri í kekkiska ferðalagnum hava fingið koronu - dysturin verður helst av ongum

Kekkiska ferðalagið fór av landinum, og so var spurningurin fyri kekkar: Hvussu verður við HM-luttøkuni. Saman við tilburðunum hjá venjarunum og einum leikara, ið ikki vóru við í Føroyum orsakað av stafestum tilburðum 2. januar, hevði Kekkia ellivu koronatilburðir í farnu viku, og fleiri eru staðfestir í hesari vikuni. Harvið er tað vorðið greitt fyri Jan Filip, hansara hóp og kekiska hondbóltssambandið, at tað ikki ber til at fara til Egyptaland.

Kekkia hevur í í dag meldað avboð til IHF, og harvið verður dysturin móti Svøríki hósdagin av ongum. Kekkia var eisini í bólki við Kili og vertstjóðini. 

Norðurmakedónia er "fyrsta eykaliðið" og hevur sambært altjóða hondbóltssamgonguni fingið innbjóðing til at luttaka.

USA, ið eftir ætlan skal luttaka til sítt fyrsta HM-endaspæl, hevur eisini risatrupulleikar. Skjótt samansetti hópurin er raktur av heili 18 koronatilburðum. Tað eru tó heili 30 leikarar í bruttohópinum, sum er á venjingarlegu í Danmark í løtuni, og sum nú er, so er ætlanin at fara til Egyptalands við teimum.

Brasil hevur eisini fingið sjey staðfestar tilburðir - millum annað hava stjørnuleikarin Thiagus Petrus og venjarin Marcus Tatá smittuna, skrivar tv2.dk.

HM-endaspælið fer í gongd í annaðkvøld.

 

 

placeholder
placeholder