KÍ-liðformaðurin: - Hetta eru teir dystirnir vit minnast

- Tað er eingin loyna, at tað er nakað eyka uppá spæl. Haldi ikki vit skulu vera so bangnir fyri at kalla tað, hvat tað er. Tá man kemur víðari í hesari kappingini, so er hvør dystur tann mest umráðndi, og tað verður tað aftur í morgin. Vit hava lagt eitt gott útgangsstøði við dystinum í Serbia og eru øgiliga spentir.

Orðini eigur KÍ-liðformaðurin. Stutt eftir stuttu venjingina við Djúpumýru í kvøld setti hann orð á støðuna hjá KÍ eftir 0-0 í fyrra Conference League-dystinum móti Radnicki og á sinnisstøðuna undan seinna dystinum í 2. umfari

Hvussu kunnu vit vænta at síggja KÍ spæla dystin, sum skal vinnast, spyrja við Jákup Biskopstø Andreasen:

- Eg haldi, at nógvir evropeiskir dystir hjá okkum líkjast øðiliga nógv. Tá tú spælir í Evropa, so er at royna at tryggja sær tað at halda nullið fyrst. Tað er høvuðsmálið hóskvøldið. Í Serbia megna vit at hótta eitt sindur, og tann partin plaga vit at vera betri til á okkara heimavølli, við okkara undirlagi.

So: Fyrst og fremst kemur man at síggja eitt KÍ-lið, sum fer at arbeiða gróthart og so hótta meira enn í fyrra dystinum, lovar liðformaðurin.

Jákup saman við soninum eftir 2-0 sigurin á SJK í Klaksvík í 1. umfari (Mynd: Sverri Egholm)

- Ein fragd

27-ára gamli klaksvíkingurin kemur eisini inn á heimáskoðararnar. Tá yvir eitt samdøgur var til dystin, var útselt við Djúpymýru. 

Talan er um 1.600 setur, og so nógv hava ongantíð verið til evropeiskan dyst í Klaksvík áðrenn - vóru umleið 1.350 setur til og við dystirnar í fjør.

- Hetta eru teir dystirnir, vit minnast. Dysturin í fyrsta umfari móti SJK var ein fragd - serliga í "samspælinum" millum spælið, okkum og fjeppararnar. Tað var heilt fantastiskt.

KÍ'arnir fagna áskoðarunum, sum settu sín dám á móti SJK fyri 13 døgum síðani (Mynd: Sverri Egholm)

Hoyr alla samrøðuna við Jákup B. Andreasen ovast.

Uefa Europa Conference League
Í morgin, hósdagin 30. juli

19.45: KÍ - Radnicki (0-0)
Stroyming: KÍ-Varpið

Til ber at fylgja við ovast á Portalinum og í okkara beinleiðis bloggi. FM1 sendir eisini frá dystinum.