Fótbóltur

Korona ávirkar næstbestu deildina hjá monnum

Fýra dystir í 1. deild hjá monnum, sum eftir ætlan skuldu spælast í morgin eru útsettir orsakað av koronatiltøkunum, sum eru sett í verk. Eisini dystir í yngru deildunum eru útsettir.

(Mynd: Hans Erik Danielsen)

(Mynd: Hans Erik Danielsen)

2020-09-21 23:50 Author image
Tíðindaskriv
placeholder

Fýra dystir í 1. deild hjá monnum, sum eftir ætlan skuldu spælast týsdagin 22. september, eru fyribils útsettir. Orsøkin er koronatiltøkini, sum eru sett í verk á Glasir og í skúlanum á Fløtum.

Kappingarnevndin í Fótbóltssambandi Føroya hevur avgjørt at útseta fýra dystir í 1. deild hjá monnum, sum eftir skránni skuldi spælast týsdagin 22. september.

Talan er um B36–B71, HB–KÍ, 07 Vestur–AB og FC Hoyvík–Víkingur.

Orsøkin er koronatiltøkini, sum eru sett í verk á Glasir og í skúlanum á Fløtum. Kravt verður nevniliga, at allir næmingar, ið hava sína dagligu gongd á Glasir, og næmingarnir í skúlanum á Fløtum, sum halda til í miðhæddini í FSF-húsinum, skulu vísa eina negativa koronatest, sum er tikin í fyrsta lagi mikudagin 23. september, áðrenn teir sleppa at spæla dystir aftur.

Koronatiltøkini ávirka eisini kappingarnar hjá U15-gentum og U15-dreingjum. Dystirnir millum Skála og HB, og 07 Vestur og B36 í kappingini fyri U15 Gentur, sum skuldu verða týsdagin, eru fyribils útsettir. Tað sama er galdandi fyri dystirnar í U15 Dreingir millum HB b og NSÍ, og B36 b og B71, sum skuldu spælast mikudagin.

Fótbóltssamband Føroya boðar samstundis frá, at um fleiri lið eru ávirka av nevndu støðu, verður heitt á feløgini um at boða FSF frá skjótast tilber.

placeholder
placeholder