Kurvabóltur er nú sersamband

Kurvabóltssamband Føroya er nú sersamband innan ÍSF. Tað varð einmælt samtykt á aðalfundinum hjá ÍSF leygarmorgunin.

Kurvabóltur hevur verið eitt av níggju menningarsambondum undir ÍSF, síðani Kurvabóltssambandið varð sett á stovn í 2017, og eru tey nú fyrsta samband, sum skifta status frá menningarsambandi til sersamband, skrivar ÍSF í tíðindaskrivi.

Nevndin í Kurvabóltssambandinum metti, at tíðin nú var búgvin til at søkja um limaskap sum sersamband í ÍSF, og hesum tóku bæði starvsnevndin og ein samdur aðalfundur undir við.

At skifta frá Menningarsambandi til Sersamband hevur ymsar fyrimunir við sær - serliga fíggjarligar.

Tey, sum stjórna kurvabóltinum í Føroyum, mettu, at kurvabólturin herheima hevði ment seg so nógv, sum til bar, innan karmarnar, sum menningarsambondini hava, og tí var næsta natúrliga stigið, at gerast Sersamband, skrivar ÍSF.